 |
Հայաստանի Համար Լավ Է
iravunkdefacto 10/07/09
Քաղաքագետ
Իգոր Մուրադյանը հուլիսի 8-ին Դե ֆակտո ակումբում իր գնահատականը տալով
Մոսկվայում տեղի ունեցած Մեդվեդեւ-Օբամա հանդիպմանը, ընդգծել է Հայաստանի
տեսանկյունից նպաստավոր երկու համաձայնություն, որ ձեռք են բերել ԱՄՆ եւ ՌԴ
նախագահները: Առաջինը, ըստ քաղաքագետի, դա ռազմավարական հարձակողական հրթիռների
կրճատման մասին պայմանագիրն է, եւ երկրորդը` Աֆղանստանի օպերացիայի համար ՌԴ
տարանցիկ ենթակառուցվածքների օգտագործման մասին համաձայնությունը:
“Դա իսկապես մեզ համար գերկարովոր բան է: Ինչու: Որովհետեւ այսպես թե այնպես,
Հարավային Կովկասի նշանակությունը, որպես տարանցիկ տարածաշրջան, նվազում է:
Մենք չէինք կատարում այդ խնդրում, այդ գործառույթում, որեւէ դեր: Դեր կատարում
էին Վրաստանն ու Ադրբեջանը: Իհարկե, Հարավային Կովկասը կմնա կարեւոր տարանցիկ
տարածաշրջան: Բայց, ես կարծում եմ, որ եթե այդ պայմանագիրը Ռուսաստանի հետ
իրականացվի, եւ կայուն զարգացում ունենա, ապա այսպես թե այնպես, Կովկասը կդառնա
պահեստային տարբերակ: Այսինքն նա կօգտագործվի, բայց կլինի պահեստային տարբերակ:
Պետք է ասել, որ մինչ այդ էլ նա միշտ եղել է պահեստային տարբերակ: Այն երբեք չի
եղել հիմնական: Դրա համար էլ Միացյալ Նահանգները մշտապես որոնում էին
այլընտրանքային ճանապարհներ, ենթակառուցվածքներ` Իրանի միջով, արաբական
աշխարհով, Հնդկական օվկիանոսով, եւ այլն: Ես կասեի, որ նրանք դա այդպես էլ
չգտան”, ասում է Իգոր Մուրադյանը:
Նրա խոսքով, Հայաստանը շահում է, եթե Հարավային Կովկասը չի լինում
ենթակառուցվածքների հիմնական տարանցիկ ճանապարհ, որովհետեւ տարանցման առումով
Հայաստանը չունի դերակատարում: Այսինքն, եթե Կովկասը լինում է պահեստային ուղի,
նվազում է Կովկասի նշանակությունը տարանցիկության առումով, ապա նվազում է նաեւ
Վրաստանի ու Ադրբեջանի առավելությունը մեր հանդեպ այդ հարցում: