 |
ԵԿԵԼ
Է ԺԱՄԱՆԱԿԸ, ՈՐ ՄԵՐ ՏԵՍԱԿԸ ՀԱՎԱԿՆՈՒԹՅՈՒՆ ՆԵՐԿԱՅԱՑՆԻ ԱՌԱՋՆՈՐԴԵԼՈՒ ԺՈՂՈՎՐԴԻՆ
Ասում է Ժիրայր Սեֆիլյանը` բացատրելով, որ մոտ է բյուրեղացման պահը
Հարցազրույց Շուշիի առանձնակի գումարտակի հրամանատար Ժիրայր Սեֆիլյանի հետ:
- Պարոն Սեֆիլյան, ՀԱԿ-ի անդամներից միայն կարծես Դուք եք ակտիվորեն
պայքարում հայ-թուրքական արձանագրությունների դեմ` տարաբնույթ ակցիաներով ու
հայտարարություններով: Ի՞նչ մտահոգություններ ունեք, որոնք Ձեզ թույլ չեն տալիս
լռել:
- Պարզապես մենք չենք կարող ձեռքներս ծալած նստել: Միշտ հրապարակայնորեն
արտահայտել ենք մեր տարաձայնությունը Կոնգրեսի ղեկավարության հետ: Միաժամանակ
ասել ենք, որ չենք պատրաստվում երկար ժամանակ լուռ մնալ` հլու-հնազանդի դերում:
Պարզապես այս հայ-թուրքական սիրախաղն ամեն ինչ շատ ավելի արագացրեց:
- Ի՞նչն է Ձեզ անհանգստացնում:
- Մենք խիստ ձեւով քննադատել ենք Կոնգրեսի կեցվածքը` սեպտեմբերի 2-ի հայտնի 4 կետանոց հայտարարությունը, որտեղ ասվում էր, որ մի կետին համաձայն չեն, բայց գործընթացը մեծ հաշվով ողջունում են: Մենք համարում ենք, որ ոչ թե պետք է այսօր քննարկել այդ արձանագրությունների բովանդակությունը, այլ առհասարակ... Երբ մենք չունենք պետություն, այն զավթված է մի խումբ մաֆիոզների կողմից, այս օրերին վստահել դրանց մի ողջ բանակցային գործընթաց, ուղղակի զավեշտ է: Այս մասով մենք մեր զայրույթը փոխանցել ենք:
- Վերջին շրջանում հայ-թուրքական արձանագրություններին «ոչ»
ասելու ակցիաներ են կազմակերպվում: Դրանց ինչպե՞ս եք վերաբերվում:
- Այնտեղ եւս մենք չենք տեսնում այն համահունչ «ոչ»-ը, որը մենք պատկերացնում
ենք: Ըստ էության մեր տեսակետը տարբերվում է ե°ւ Տեր-Պետրոսյանի տեսակետից, ե°ւ
այսօրվա Դաշնակցության կեցվածքից ու նրանց հայտնած մտքերից: Մենք համարում ենք,
որ ա) գոյություն չունեն հայ-թուրքական հարաբերություններ, առկա է
հայ-թուրքական հակամարտություն, բ) աշխարհագրորեն հարեւանությունը ոչ միշտ
կարող է պարտադրել բարիդրացիական հարաբերություն: Այո, Թուրքիան հարեւան երկիր
է, սակայն այդ պետությունը Հայաստանը եւ հայությանը բնաջնջելու նպատակ ունի: գ)
Օտարի հովանավորությամբ, ինչու չէ նաեւ պարտադրմամբ, հարաբերությունների
հաստատումը խախտում է տարածաշրջանում առկա ուժերի հարաբերակցությունը, որը
սպառնում է հայ ժողովրդի ֆիզիկական գոյությանը: Մեր կարծիքով, հայ ժողովրդի
ֆիզիկական գոյությունը պահպանելու հիմնական երաշխիքները հետեւյալն են` 1.
համասփյուռ հայ ժողովրդի միասնականությունը, որը դժբախտաբար այսօր գոյություն
չունի, երկրորդ` հայկական արժեքներով տոգորված հայկական բանակ, որն, իմ
համոզմամբ, եւս գոյություն չունի այսօր, եւ երրորդ` հայրենի տարածքներ, որոնք
վերահսկվում են այսօր հայերի կողմից: Բարեբախտաբար, այս երրորդ գործոնն այսօր
առկա է:
Մեր համոզմամբ այս ամբողջ գործընթացի առանցքը ազատագրված տարածքների կորզումն է
հայերից: Սա է, որ պետք է կանխենք:
- Այլապես ի՞նչ կլինի:
- Տարածքները զիջելուց հետո խոսել Ցեղասպանության մասին, Կարսի պայմանագրի
մասին, անիմաստ է դառնում: Մեր համոզմամբ, տարածքները զիջելուց հետո ոչ միայն
Արցախն ենք կորցնում, այլեւ ամբողջ հայկական պետականությունը: Սա է մեր
տարբերությունը մնացած ուժերից:
- Պարոն Սեֆիլյան, տարաբնույթ ակցիաներով հնարավո՞ր է հասնել ինչ-որ
արդյունքի:
- «Միացում» շարժման ակցիաների նպատակը այս ընթացքը կասեցնելը չէ: Այսօր մենք,
ըստ էության, գտնվում ենք հոգեբանական պատերազմի մեջ: Մեր ակցիաների իմաստն ու
բովանդակությունը այդ կոնտեքստում պետք է դիտել: Ես չէի ասի, որ մեծ
արդյունքների ենք հասել, սակայն պարապ նստելուց լավ է: Գոնե հոգեբանական
պատերազմում հիշեցնենք, որ հայերը կան:
- Եթե ձեր ակցիաների նպատակը ընթացքը կասեցնելը չէ, ի՞նչն է:
- «Միացումը» երբեք այդ հավակնությունը չի ներկայացրել եւ սրա հետեւանքով ի
վերջո ծնվեց «Սարդարապատ» շարժման նախաձեռնությունը, որի նախաձեռնողներից մեկը
ես եմ: «Սարդարապատի» նպատակը նույնպես ընթացքը կասեցնելը չէ, որովհետեւ այս
սիրախաղը հետեւանք է մեր երկրում առկա անբարո, այլասերված մթնոլորտի,
անօրինությունների: Ուստի «Սարդարապատ» շարժումը չի պատրաստվում վազել
հետեւանքի հետեւից, մենք գնալու ենք պատճառները վերացնելու: Իսկ պատճառը
կվերանա այն ժամանակ, երբ հնարավորինս կարճ ժամկետներում տեղի ունենա
իշխանափոխություն եւ հաստատվի բարոյական արժեքներ կրող իշխանություն:
- Հնարավո՞ր է Հայաստանում ունենալ բարոյականության հետ ընդհանրություններ
ունեցող իշխանություն:
- Ես համարում եմ, որ Լեւոն Տեր-Պետրոսյանը, մեծ քաղաքականություն վերադառնալով,
Հայաստանի «քաղաքական դաշտը» սեւ ու սպիտակ դարձրեց: Այս ամենից հետո այլեւս
հնարավոր չէ մեր ժողովրդին մոլորեցնել: Այսօր եկել է բյուրեղացման պահը: Եթե
ընդդիմությունը ցանկանում է նորից մոբիլիզացնել ժողովրդին, ուստի պարտավոր է
ձեւավորել մի օղակ, ավելի առարկայական պետք է ասեմ` «Սարդարապատ» կոմիտեն, որը
կձեւավորվի առաջիկա օրերին: Այդ կոմիտեում պետք է ընդգրկվեն այնպիսի մարդիկ,
որոնք առաջին հերթին ազնիվ են, պատրաստ ընդհանուրի համար գնալ զոհողությունների,
լինել վճռական եւ հանդուգն:
- Կա՞ն արդեն հավաքված այդպիսի հատկանիշներով օժտված մարդիկ:
- Քանի որ հայերը միշտ առեղծվածային կերպով գոյատեւել են եւ հիմա էլ պիտի
գոյատեւենք, բարեբախտաբար, այդ մարդիկ կան: Իմ տեսակը երկար տարիներ եղել է
աջակցողի դերում` այս կամ այն ուժին: Սակայն այսօր մենք համարում ենք, որ եկել
է ժամանակը, որ մեր տեսակը հավակնություն ներկայացնի` մեր ժողովրդին
առաջնորդելու: Երբ «Սարդարապատում» ընդգրկվեն նշածս որակներով մարդիկ, համոզված
եմ, որ մեր ժողովուրդը հույսի նոր լիցք է ստանալու, եւ ինչ-որ ժամանակ հետո
կոմիտեին կհաջողվի մոբիլիզացնել ժողովրդին:
- Փաստորեն ՀԱԿ-ից դուրս չգալով, նոր միավոր եք ստեղծում. դրանք կխանգարե՞ն
միմյանց, թե՞ կփոխլրացնեն:
- «Սարդարապատ» շարժումն ունի իր առանձին ճանապարհը, նպատակները, իր ծրագրերը:
Մենք շուտով կունենանք նաեւ պլատֆորմ, ներքին կանոնադրություն, որոնք
կհրապարակվեն: Այս ընթացքում այն ուժերը, որոնք կփորձեն օժանդակել կամ աջակցողի
դերում լինել, մենք միայն ուրախ կլինենք: Մենք գիտենք, որ մեր ընտրած ճանապարհը
բավականին դժվար է, սակայն ես լավատես եմ: Եթե մաքուր մարդիկ պատրաստվում են
իրոք լուրջ գործ ստանձնելու, ի վերջո արդյունքի կհասնեն:
- Դաշնակցությունն ու նրան միացած մյուս ուժերը եւս հանդես են գալիս ազգային
դիրքերից, այնպես, ինչպես Դուք: Ինչպե՞ս պետք է հասարակությունը տարբերի «թացը
չորից»:
- Ժողովրդին առաջնորդելու գործը սուրբ գործ է: Հնարավոր չէ միաժամանակ զբաղվել
ե°ւ անբարոյությամբ, ե°ւ սուրբ գործունեությամբ: Կարծում եմ, որ ժողովուրդը շատ
լավ կտարբերի, չեմ ուզում անուններով խոսել: Իշխանություններին չի հաջողվելու
այդ բուրգը կառուցել, քանի որ այլեւս հնարավոր չէ մեր ժողովրդին մոլորեցնել:
Այդ բուրգը մի քանի նպատակներով է ձեւավորվել, որոնցից մեկը «ոչ»-ի շոուն
կազմակերպելն է: Իսկ գլխավորը հետեւյալն է. Սերժ Սարգսյանը տեսնում է, որ այս
ամենը կարող է ի վերջո անելանելի վիճակի հասցնել եւ գուցե հեղափոխությունն ինքը
կազմակերպի: Այսինքն` ապագա նախագահին կփորձեն այդ բուրգից մատուցել ժողովրդին:
Բայց համոզված եմ, որ այդ արհեստական միավորումը չի ձեւավորվելու` շնորհիվ
2008-ի շարժման:
- Եվ վերջում ի՞նչ կմաղթեք հայ հասարակությանը:
- Մենք մեր ժողովրդին ամրություն ենք ցանկանում, հոգեպես թող պինդ լինեն, երբեք
չհուսահատվեն: Ստորագրել են, կվերաստորագրեն, կվավերացնեն, թե ոչ, մեծ
նշանակություն չունեն դրանք: Մեր ժողովրդի գլխով այսպիսի արհավիրքներ շատ են
անցել, եւ ժողովուրդը միշտ վերջին պահին ճիշտ լուծումը գտել է: Այս անգամ եւս
ժողովուրդը ճիշտ լուծում կգտնի` 91 տարի հետո սարդարապատային ոգու վերադարձով: