«Ժիրայր Սեֆիլյանի քաղաքացիության հարցը դարձել է Հայոց հարց»

«Ժիրայր Սեֆիլյանի քաղաքացիության իրավունքի պաշտպանության կոմիտեն» այսօր աուլիսում ներկայացրեց Ժ. Սեֆիլյանին ՀՀ քաղաքացիություն տրամադրելու խնդրի շուրջ վերջին զարգացումները:

«Ժիրայր Սեֆիլյանի քաղաքացիության հարցը դարձել է Հայոց հարց` չարչրկվեց, ասվեց, խոսվեց, բայց լուծում չգտավ», - ասաց կոմիտեի համակարգող, ազատամարտիկ Աղավնի Սահակյանը:

Նրա խոսքով, այս տարի մայիսին կոմիտեն դիմել է ՀՀ Մարդու իրավունքների պաշտպան Ա. Հարությունյանին` Ժ. Սեֆիլյանի նկատմամբ թույլ տրված խախտումները վերացնելու համար միջոցներ ձեռնարկելու խնդրանքով: Օրերս ՄԻՊ գրասենյակից պատասխան են ստացել, որ «հարցի քննարկումը սառեցված է»:

Փաստաբան Մուշեղ Շուշանյանը տեղեկացրեց, որ ՄԻՊ-ի պատասխանը հիմնված է եղել «ՀՀ ազգային անվտանգության ծառայության բացասական կարծիքի վրա», իսկ այդ փաստաթղթի պատճենը հրաժարվել են տրամադրել, քանի որ այն համարվում է «ծառայողական գաղտնիք պարունակող փաստաթուղթ»:

«Օրենքով պետական կամ ծառայողական գաղտնիք չի կարող համարվել քաղաքացիների իրավունքների և ազատությունների սահմանափակման մասին տեղեկատվությունը», - մեջբերեց Մ. Շուշանյանը:

Փաստաբանի խոսքով, մինչ այս Ժ. Սեֆիլյանը 3 անգամ դիմել է ՀՀ նախագահին` քաղաքացիություն ստանալու համար. «Այժմ իրավական միակ ուղին դատական պաշտպանության դիմելն է»: Նա նշեց, որ վերջին մերժումը ստացել են այս տարի սեպտեմբերին և 1 տարի անց` 2010 թ. սեպտեմբերին, Ժ. Սեֆիլյանը կրկին կդիմի քաղաքացիություն ստանալու համար: Եթե այդ ժամանակ էլ մերժում ստանան, ապա դիմելու են դատական ատյաններին:
 

14.12.2009, 12:43

Aysor.am