Հայ-թուրքական արձանագրությունների ժամանակ Ղարաբաղի հարցը եղել է տարաձայնությունների պատճառ

 7or news 11/10/09

Ադրբեջանական ԶԼՄ-ները, հղում կատարելով իրենց թուրքական աղբյուրներին, նշում են այն պատճառները, թե ինչու սկզբում հայկական պատվիրակությունը հրաժարվել է ստորագրել հայ-թուրքական արձանագրությունները և լքել է դահլիճը, ինչի արդյունքում ստորագրման արարողությունը հետաձգվել է։ Մասնավորապես նշվում է, որ Թուրքիայի արտգործնախարար Ահմեդ Դավուդօղլուն ծրագրել էր արձանագրությունների ստորագրումից հետո իր ելույթում կենտրոնանալ ղարաբաղյան խնդրի վրա։ Դրա դեմ ընդվզել է հայկական պատվիրակությունը և լքել է արարողությունների դահլիճը։

Bakililar.AZ-ը գրում է, որ ԱՄՆ պետքարտուղար Հիլարի Քլինթոնի միջամտությամբ՝ հայկական պատվիրակությունը «կոմպրոմիսի գնով» վերադարձել է դահլիճ։ Քանի որ թուրքերը հրաժարվեցին իրենց ելույթում ինչ-որ բան փոխել, ձեռք է բերվել պայմանավորվածություն, որ ո՛չ Թուրքիայի, ո՛չ էլ Հայաստանի արտգործնախարարները ելույթ չեն ունենալու՝ այդ հնարավորությունը ընձեռելով երրորդ կողմերին։

Ինչպես հաղորդում է «TRT1» հեռուստաալիքը, Թուրքիայի արտգործնախարար Ահմեդ Դավութօղլուն հայտարարել է, որ Երևան-Անկարա արձանագրությունը թուրքական խաղաղության ծրագիր է։

-Չնայած նրան, որ ստորագրման հետ կապված՝ ձգձգումներ են եղել՝ մեր գլխավոր գործն այն էր, որ արձանագրությունները ստորագրվեին։ Թուրքիան գիտի՝ ուր է գնում և ինչ է անում,-հայտարարել է նա։

Հիշեցնենք, որ հոկտեմբերի 10-ին Ցյուրիխում Հայաստանի և Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն ստորագրել են հայ-թուրքական արձանագրությունները։

Ստորագրման արարողությանը մասնակցել են նաև ԱՄՆ պետքարտուղար Հիլարի Քլինտոնը, Ֆրանսիայի և Շվեյցարիայի արտգործնախարարներ Բերնար Քուշներն ու Միշլին Կալմի-Ռեյը, Ռուսաստանի արտգործնախարար Սերգեյ Լավրովը և ԵՄ-ի արտաքին և անվտանգության քաղաքականության  գերագույն հանձնակատար Խավիեր Սոլանան։

-Տարածաշրջանում խաղաղություն ապահովելու համար անհրաժեշտ է հայ-ադրբեջանական հակամարտության կարգավորում,-հայտարարել է Թուրքիայի արտգործնախարարը և հավելել,- արձանագրությունների ստորագրումը չի նշանակում, որ մենք թողել են Ադրբեջանը. մենք միշտ եղել ենք Ադրբեջանի հետ և երբեք չենք վնասի նրա շահերին։ Երբ մենք խոսում ենք տարածաշրջանում խաղաղության մասին, նկատի ունենք «ադրբեջանական տարածքների ազատագրումը»։

Արտգործնախարարը նաև հայտարարել է, որ անհրաժեշտ է ազատագրել «ադրբեջանական օկուպացված տարածքները», ոչ միայն Ղարաբաղը, այլև «օկուպացված» մյուս շրջանները։

-Եթե թուրքական խորհրդարանը վավերացնի ստորագրված արձանագրությունները, դա կլինի դիվանագիտական հարաբերությունների սկիզբ։ Խոսքերն այն մասին, թե Թուրքիան չի ընդունում Հայաստանը որպես պետություն, զրպարտություն են։ Թուրքիան ընդունում է Հայաստանի Հանրապետությունը, և մինչև  1993թ-ն սահմանները բաց են եղել։ Հայաստանի կողմից ադրբեջանական տարածքների «շրջափակումն» է սահմանների փակման պատճառ դարձել,-ասել է Դավութօղլուն։

Ըստ «Vesti.az»-ի