"ՉԻ"-ն արդեն տեղեկացրել էր, որ "Ժառանգության" պատգամավոր Զարուհի Փոստանջյանին ԱԺ նախագահ Հովիկ Աբրահամյանը որոշել է ընդգրկել ԵԽԽՎ պատվիրակների փոխարինող կազմում: Սակայն այդ կապակցությամբ հրավիրված նիստը ԱԺ նախագահն անցկացրել է արձակուրդի օրերին: Երեկ մենք փորձեցինք Զարուհի Փոստանջյանից պարզել` նրան ԱԺ նախագահը հրավիրե՞լ էր այդ նիստին:

- Այո, զանգահարել էին իմ բջջային հեռախոսահամարին եւ հայտնեցին, թե Հովիկ Աբրահամյանի մոտ նիստ է, չե՞ք գալու: Ես էլ պատասխանեցի, որ ոչ` ես արձակուրդում եմ եւ այժմ ՀՀ սահմանադրական դատարանի առջեւ հանրահավաքի եմ մասնակցում, չեմ կարող գալ: Չգիտեի էլ, թե ինչ նիստ է, ինչ օրակարգով եւ այլն: Այդ նիստին "Ժառանգությունից" Ստեփան Սաֆարյանն է մասնակցել:

- Ձեր տպավորությամբ, խնդիր կա՞ դրված, որպեսզի ԵԽԽՎ աշխատանքներին Դուք չմասնակցեք:

- Քանի որ իմ կարծիքը, որը ես մշտապես հայտնել եմ ԵԽԽՎ-ում, տարբերվում է իշխանության եւ այսօր իրեն ընդդիմություն հռչակած Դաշնակցության կարծիքից, դրա համար էլ ցանկություն չկա, որ ժողովրդի ձայնը լսելի լինի ԵԽԽՎ-ում: Նրանք չեն ուզում, որ հասարակության կարծիքը հնչի:

- Այսինքն՝ Դաշնակցությունն ավելի վերահսկելի՞ է:

- Դաշնակցությունը ուղղակի հայտարարել է, որ ընդդիմություն է` պաշտոնապես հրապարակելով կոալիցիայից դուրս գալու իր պատճառները, որոնց թվում միայն նշվում էր, որ իրենք համաձայն չեն այս իշխանությունների վարած արտաքին քաղաքականության հետ: Բայց ներքաղաքական հարցերում նրանք իշխանության հետ համաձայն են: Դաշնակցությունը բացարձակ անգործություն դրսեւորեց այն ողբերգական իրադարձությունների կապակցությամբ, որոնք տեղի ունեցան մեր երկրում` կեղծված նախագահական ընտրություններ, մարտի 1-ի արյունալի իրադարձությունները, զոհեր, քաղբանտարկյալներ... ՀՅԴ-ն այս ամենի հետ համաձայն է:

Բայց այդ կուսակցությունը արտաքին քաղաքական հարցերում եւս իշխանությունից տարբերվող քայլեր առանձնապես չի անում: Ես բանաձեւի նախագիծ էի նախաձեռնել, որը վերաբերում էր ԵԽԽՎ նախագահի ընտրությանը: Իմ նախաձեռնությամբ պետք է խոչընդոտներ հարուցվեին ԵԽԽՎ նախագահի պաշտոնում Թուրքիայի Հանրապետության ներկայացուցչի ընտրության համար: Հայտնի է, որ մենք ունենք խնդիրներ այս երկրի, ինչպես նաեւ Ադրբեջանի հետ: Եվ ԵԽԽՎ նախագահի պաշտոնում ազգությամբ թուրք նախագահի ընտրության դեպքում հնարավոր է մեր խնդիրները լուծվեն ոչ ի շահ մեր երկրի, համասփյուռ հայության եւ Արցախի Հանրապետության, այլ ի շահ Թուրքիայի եւ Ադրբեջանի: Այս նախագծի տակ Դաշնակցության ներկայացուցիչ Արմեն Ռուստամյանը չստորագրեց` պատճառաբանելով, թե միեւնույն է, այդ նախաձեռնությամբ չի կանխվելու այդ անձի ընտրվելու գործընթացը: Իսկ ԵԽԽՎ հայաստանյան պատվիրակության ղեկավար Դավիթ Հարությունյանը ինձ ասաց, որ չի ցանկանում փչացնել իր բարիդրացիական հարաբերությունները Թուրքիայի ներկայացուցիչների հետ, դրա համար էլ չստորագրեց:

- Իսկ Թուրքիայի ներկայացուցիչների կողմից ինչպե՞ս ընդունվեց Ձեր նախաձեռնությունը:

- Մոնիտորինգի նիստից հետո ինձ մոտեցավ Թուրքիայի ներկայացուցիչ Չավիշօղլուն եւ շատ վրդովված էր, որ նման նախաձեռնություն եմ դրել շրջանառության մեջ: Նա ասում էր, թե ես այդ նախաձեռնությամբ խաթարում եմ հայ-թուրքական բարիդրացիական հարաբերությունների սկիզբը: Ես էլ հակադարձեցի, որ Թուրքիայի հետ Հայաստանը կարող է բարեկամանալ միայն այն դեպքում, երբ ձեր կողմից ճանաչվի Հայոց ցեղասպանությունը եւ ներողություն խնդրեք: Սակայն Չավիշօղլուն հղում կատարելով արձանագրություններին, ասաց, թե հարց է` ցեղասպանություն եղե՞լ է, թե՞ չի եղել, դա պատմաբանների հանձնաժողովը կորոշի, նոր կխոսենք: Փաստորեն Արմեն Ռուստամյանի ամպագոռգոռ մտքերը, որը նա հայտնում է կուսակցության անունից, թե իրենք դեմ են հայ-թուրքական արձանագրություններին եւ ընդհանրապես այսօրվա իշխանության վարած արտաքին քաղաքականությանը, լոկ խոսքեր են: Իրականում նրանց գործունեությունն ու խոսերը տարբերվում են: ՀՅԴ-ն պարտավոր էր ստորագրել այդ նախաձեռնության տակ` անկախ նրանից` այն կունենա՞ր հաջողություն, թե՞ ոչ: Նրանք պարտավոր էին ջանքեր գործադրել, Ռուստամյանը ԵԽԽՎ-ում վաղուց է ներկայացված եւ իր կապերն օգտագործելով աջակցեր այս նախաձեռնությանը: Բայց դիտավորյալ նրանք չէին ստորագրում, որպեսզի ես չկարողանայի հասցնել մինչեւ բյուրոյի նիստ: Բայց ամեն դեպքում ինձ հաջողվեց: Եվ մինչ հունվարի 25-ին ժամը 11:30-ին ԵԽԽՎ-ն կսկսի իր աշխատանքը, պետք է իմ նախաձեռնությունը քննարկվի:

- Ձեր կարծիքով, ինչո՞ւ էր "Օրինաց երկրից" Հեղինե Բիշարյանը գրություն գրել, որպեսզի Ձեզ տեղափոխեն փոխարինող կազմ:

- Իմ կարծիքով դա ուղղակի Հովիկ Աբրահամյանի կողմից նախաձեռնած աճպարարություն էր, որտեղ Հեղինե Բիշարյանը որպես մի օղակ է հանդես գալիս: Ես կարող եմ պնդել, որ դա ՕԵԿ-ի ցանկությունը չի եղել: Ես շատ հարգում եմ Արծրունի Աղաջանյանին, նա շատ լավ մարդկային հատկանիշներ ունի, բայց պետք է նշեմ, որ ապրիլ ամսից մինչեւ օրս նա ԵԽԽՎ-ում որեւէ ելույթ կամ ելույթ ունենալու ցանկություն չի հայտնել: Նա մշտապես փոխարինել է Դավիթ Հարությունյանին, որը գրեթե բացարձակ ներկա չի գտնվել նիստերին: Եթե պարոն Աղաջանյանը ԵԽԽՎ մշտական անդամ լինելու ցանկություն ուներ, նա ուներ այդ հնարավորությունը, կարող էր մշտապես ելույթներ ունենալ: Ինչ վերաբերում է տիկին Բիշարյանի այն պնդմանը, որ նշել է, թե հավասար ներկայությունը խախտված է, ապա պետք է ասեմ, որ այս պահին ԵԽ-ում ներկայացված է 8 պատգամավոր, որոնցից 6-ը իշխանության ներկայացուցիչներն են, մեկը "Ժառանգությունից", մեկն էլ` ՀՅԴ-ից: Ներկայացվածներից միայն "Ժառանգությունն" է եղել ընդդիմադիր կուսակցություն եւ մինչեւ օրս էլ ընդդիմադիր է մնում:

- Դուք Հովիկ Աբրահամյանի հետ խնդիրներ ունե՞ք, որ հենց Ձեր դեմ է նման քայլեր անում:

- Անձնական որեւէ խնդիր ես չունեմ որեւէ անձի հետ: Ես իմ պարտականություններն եմ կատարում: Ժողովուրդն ինձ ընտրել է, եւ ես ժողովրդին եմ ծառայում ու պարտավոր եմ իրականացնել ժողովրդի պահանջը. իսկ ժողովուրդն ինձանից պահանջում է այսպիսի վարքագծի դրսեւորում: Սա լինելու է մշտապես: Այնպես որ, պարոն Աբրահամյանը թող չուրախանա: Նույնիսկ եթե նա փորձ է անում փոխարինողի կարգավիճակով խոչընդոտել, որպեսզի չմասնակցեմ ԵԽԽՎ աշխատանքներին, միեւնույն է, ես իմ աշխատանքն իրականացնելու եմ:

- Հովիկ Աբրահամյանի գործողությունները բողոքարկելո՞ւ եք:

- Իհարկե, հենց որ մենք պաշտոնապես տեղեկություն կստանանք իր ապօրինի գործողությունների վերաբերյալ, դրանք կարժանանան համապատասխան պատասխանի: Թող պարոն Աբրահամյանը պատերազմ հայտարարելուց առաջ մտածի, թե իր զինանոցում ինչ միջոցներ ունի: Մենք շատ միջոցներ ունենք:

Զրուցեց ԹԱԳՈՒՀԻ ԹՈՎՄԱՍՅԱՆԸ