Անցած 19 տարիներին չկարողացանք ժամանակը ի օգուտ մեզ օգտագործել. Ժիրայր Սեֆիլյան

«Հայ ժողովրդին ավելի հարազատ կլիներ այն օրը, երբ Արցախը իրավականորեն միացած լիներ Հայաստանին։ Արժեր այդ տոնը նշել, այլ ոչ թե Արցախի անկախության»,- Tert.am-ին ասաց Շուշիի առանձնակի գումարտակի նախկին հրամանատար Ժիրայր Սեֆիլյանը՝ խոսելով ԼՂՀ Անկախության տոնի մասին։

Սեֆիլյանի խոսքով՝ ինքն ի սկզբանե կողմակից է եղել Հայաստանի և Արցախի միացմանը, այլ ոչ թե անկախությանը. «Այս երկվությունը ներազգային իմաստով միայն վնաս է տալիս, օգուտ չկա»։

Նա հույս հայտնեց, որ դա հնարավորին շուտ կլինի, և հայ ժողովրդի այդ երազանքը կկատարվի։

«Այս 19 տարիներին մենք չկարողացանք ժամանակն ի օգուտ մեզ օգտագործել, և, դժբախտաբար, շարունակվում է այդ սխալ ընթացքը։ Պետք է գիտակցենք, որ ամեն մի օրը մեծ նշանակություն ունի։ Եվ այս երկար տարիների հետ այսպես ապիկար վերաբերվելը, ես կարծում եմ, հանցագործությանը համարժեք է»,- նշեց Սեֆիլյանը։

Ըստ նրա՝ հայերը մեկ օրակարգ ունեն՝ օր առաջ ձևավորել հայկական պետություն, ինչը մինչև օրս մեզ չի հաջողվել։ «Այս օրակարգն է առաջնահերթ, միայն դրանից հետո հնարավոր կլինի խոսել ինչ-որ ձեռբերումների մասին։ Այս իշխանություններին ես ոչ մի խորհուրդ չեմ պատրաստվում տալ, որովհետև անիմաստ է»,- ընդգծեց նա։

Tert.am 02.09.10