«ՄԵՆՔ ՉԵՆՔ ՈՒԶՈՒՄ ԿՏՐՈՒԿ ՔԱՅԼԵՐԻ ԴԻՄԵԼ, ՈՐ ԵՂԱԾԸ ՉԽԱԹԱՐՎԻ»

e-channel 19/06/09 

Հարցազրույց «Հայ կամավորականների համախմբման ազգային քաղաքական նախաձեռնության» համակարգող Ժիրայր Սեֆիլյանի հետ
«Ասում են` մտածում են, իրենց պլատֆորմն են մշակում: Մեր երկրի վիճակը այնքան լուրջ է, որ այս իրավիճակում այսպիսի դանդաղկոտություն ցուցաբերելը թիթիզություն է: Հիշել, թե` ես քեզ սա ասացի, դու սա ասացիր: Սա անլուրջ մոտեցում է»:  

Վերջին հանրահավաքում Լեւոն Տեր-Պետրոսյանը հայտարարեց, որ հաջորդ հանդիպումը լինելու է սեպտեմբերի 18-ին: Ձեր կարծիքով` այս յուրօրինակ արձակուրդը պայքարի այս փուլում արդարացվա՞ծ է:

Չեմ կարծում, թե հայտարարվել է արձակուրդի մասին, չնայած այսպիսի երկար ընդմիջումները մեզ երբեք դուր չեն եկել, այս անգամ` նույնպես: Մեր կարծիքը ընդդիմության մարտավարության մասին միշտ հայտնել ենք, այս անգամ` եւս: Մեր ցանկություններն ու ընդդիմության որոշած մարտավարությունը չեն համընկնում:

Ո՞ր հարցերում հատկապես:

Մենք միշտ ասել ենք, որ պետք է ժողովրդական ալիք բարձրացնել եւ պարտադրել այս ռեժիմի տապալումը: Սա շատ պարզ է: Պետք է շուրջօրյա հանրահավաքներ կազմակերպել եւ մարզերում ապրողներին հրավիրել մայրաքաղաքի կենտրոն:   Իմ ասածը միանգամայն տեղավորվում է ժողովրդավարություն ասվածի շրջանակներում, եւ   մենք մեր իրավունքները գիտենք: Մենք ՀԱԿ –ում միակ ուժն ենք եղել, որն ասում էր, թե քաղաքապետի ընտրություններին չպետք է մասնակցել: Համոզված էինք, որ ժողովուրդը իր որոշումը վաղուց է կայացրել, բայց ժամանակ առ ժամանակ հույս է ունենում, որ ընդդիմության այս կամ այն առաջնորդին կհաջողվի ընտրությունների արդյունքներով երկրում իրավիճակ փոխել: Ժողովուրդը շատ լավ գիտի, որ ընտրություններով երկրի բռնատիրությունը տապալել հնարավոր չէ: Ընտրությունը թատրոն է, անվտանգության ծառայության հատուկ օպերացիա: Ինչո՞ւ 2008 թ.-ի փետրվարի 19-ին ավելի քան 150.000 մարդ եկավ ու քվեարկեց, իսկ այս անգամ ստացվեց ընդամենը 60.000: Ընդդիմությունը պետք է գտնի այս հարցի պատասխանը,  եւ դրանից կբխի նրա մարտավարությունը:

Այնուամենայնիվ, ինչպե՞ս կանդրադառնա այս ընդմիջումը ընդդիմության հետագա պայքարի վրա:

Վատ է անդրադառնալու: Մինչեւ այս պահը վճռական գործողությունների որոշում չի կայացվել, եւ ժողովուրդը մի քիչ հեռացել է նաեւ դրա պատճառով: Բայց ես լավատես եմ եւ գիտեմ, որ գալու է պահը, ու ճիշտ որոշումը կայացվելու է:

Ինչո՞ւ դա չի արվում հիմա:

Կոնգրեսը տարբեր ուժերի միավորում է, որից մեկ կարծիք ակնկալելը ճիշտ չէ: Եթե մինչ օրս մեր կեցվածքը համոզիչ չի եղել, գնալով պարզ է դառնալու, որ մենք ճիշտ ենք:
Միակամությունը, որ կա ՀԱԿ-ում, մենք շատ ենք կարեւորում, ինչքան էլ տարակարծություններ լինեն, պետք է այդ միակամությունը պահպանել: Երկար պահպանել, ու այս դեպքում` արդյունքը ակնհայտ է լինելու:  Մենք չենք ուզում կտրուկ քայլերի դիմել, որ եղածը չխաթարվի: Այսօր էլ, վաղն էլ աշխատելու ենք, որ միավորումը ավելի ամրապնդվի: Հասկանում ենք, որ կա ժողովրդի մի հատված, որը դեմ է ռեժիմին, բայց այսօրվա ընդդիմության ղեկավարությունն էլ նրա սրտով չէ: Պետք է գտնել ձեւեր` մարդկանց գրավելու համար:

Երբ խոսում եք ընդդիմության մասին, «Ժառանգությա՞նն» էլ նկատի ունեք:

Նաեւ:

Բայց ընտրություններից հետո «Ժառանգության» եւ ՀԱԿ-ի միջեւ հարաբերությունները կարծես նորից լարվել են:

Եթե նկատի ունեք «Ժառանգության» պատգամավորների ասածը մամուլի ասուլիսում, նկատեմ, որ դա ընդամենը պոռթկում է եւ ոչ թե քաղաքական որոշում: Շատ պետք չէ ուռճացնել այդ բոլորը: Րաֆֆի Հովհաննիսյանն էլ խոսել է այդ մասին եւ հանդես է եկել իր հայտնի առաջարկով: Ամեն դեպքում` ես չեմ նկատել հակառակորդին սեւացնելու միտումներ: Կնախընտրեինք, որ եղածն էլ հրապարակային չլիներ: Այսօր «Ժառանգության» հետ մեր հարաբերությունները գործընկերային են:

Դուք դեռ սպասո՞ւմ եք Դաշնակցության արձագանքին` Լեւոն Տեր-Պետրոսյանի առաջարկին:

Ես անձնապես չեմ սպասում, Կոնգրեսի ղեկավարությունը գուցե դեռ սպասում է: Բավական ժամանակ արդեն անցել է, եւ պետք է պարզ լիներ ՀՅԴ-ն ուզում է իսկական  ընդդիմություն դառնալ թե ոչ: Մեկ ամիսը բավական ժամանակ էր` ասելու, թե ինչ են ուզում: Եթե չեն ասում, ուրեմն, անկեղծություն չկա: Ասում են` մտածում են, իրենց պլատֆորմն են մշակում: Մեր երկրի վիճակը այնքան լուրջ է, որ այս իրավիճակում այսպիսի դանդաղկոտություն ցուցաբերելը թիթիզություն է: Հիշել, թե` ես քեզ սա ասացի, դու սա ասացիր: Սա անլուրջ մոտեցում է:  

Վաղը Ազգային ժողովում քննարկվելու է համաներման մասին նախագահ Սերժ Սարգսյանի առաջարկության նախագիծը: Կարծո՞ւմ եք, որ համաներումը ներքաղաքական լարվածությունը կթուլացնի:

Իհարկե, այդպես չեմ կարծում: Լարվածությունը գուցե թուլանար, եթե քաղբանտարակյալների դատական գործերը կարճվեին ընդհանրապես, բացի սա, համաներման արդյունքում ազատ են արձակվելու ոչ բոլոր քաղբանտարկյալները: Համաներումը պարզապես Եվրախորհրդի ճնշման ներքո կատարված քայլ է: Իշխանությունները Եվրոպային անընդհատ խոստացել են հարցեր լուծել, չեն արել, հիմա էլ, նստաշրջանի նախօրյակին, ստիպված են գնում նման քայլի: