Ժողովրդին է պատկանում իշխանությունը, եւ ժողովուրդն ինչ ուզի` կանի

jamanak 15/01/10

«ժամանակ»-ի զրուցակիցը «Հայ կամավորների համախմբում» նախաձեռնության համակարգող Ժիրայր Սեֆիլյանն է:

- Պարոն Սեֆիլյան, ինչպե՞ս եք գնահատում 10-րդ ընտրատարածքում տեղի ունեցած ընտրությունների ընթացքն ու արդյունքները:

- Բռնակալական ռեժիմի պայմաններում ընտրություններին մասնակցելու խնդրով ես բազմիցս հայտնել եմ իմ տեսակետը: Եվս մեկ անգամ փաստում եմ, որ այն մարտավարությունը, որը որդեգրել են ընդդիմադիր ճամբարի որոշ ներկայացուցիչներ, ի սկզբանե դատապարտված է ձախողման: Այս ռեժիմի օրոք մասնակցել ցանկացած ընտրության, արկածախնդրություն է, ինչի հետեւանքով մեր հայրենակիցները ենթարկվում են բռնության, ծեծի եւ ապրում հերթական հիասթափությունը:

- Կարծիք կա, որ իշխանությունը տոնեց իր հերթական պյուռոսյան հաղթանակը, իսկ ընդդիմությունն էլ` բարոյական հաղթանակը: Դուք ինչպե՞ս եք վերաբերվում այդ տեսակետներին:

- Ընդդիմության մասով ես արդեն ասացի իմ տեսակետը, իսկ իշխանության համար, մեծ հաշվով, սա, իհարկե, հաղթանակ չէ: Իշխանությունը սրանով դրսեւորում է իր էությունը, որը գալիս է նրա բռնակալական բնույթից եւ հենց այդ տրամաբանությամբ էլ նա գործում է: Մեզ համար այս գործելակերպը զարմանալի չէ: Ավելի շատ զարմանալին օրենքից դուրս դաշտում մարտնչելու ընդդիմության փորձն է: Իմ համոզմամբ, ընդդիմությունը վաղուցվանից բոլորովին այլ դաշտում պետք է պայքարեր, որտեղ իշխանություններն անպայման խեղճանալու էին:

- 10-րդ ընտրատարածքում տեղի ունեցած ընտրություններում հասարակության մասնակցությունը բավականին ցածր էր` մոտ 24 տոկոս: Սա, Ձեր կարծիքով, ինչի՞ մասին է խոսում: Հասարակությունը հիասթափվա՞ծ է, թե՞ դրանով հստակ վերաբերմունք է ցույց տալիս:

- Իմ կարծիքով` ժողովուրդը հուշում է ընդդիմության ղեկավարությանը, որ մեր երկրում ընտրություններով որեւէ փոփոխության հասնել հնարավոր չէ: Սա ժողովրդի պատգամն է` ուղղված ընդդիմությանը, որին պետք է ականջալուր լինենք:

- Հերթական անգամ ընտրությունները վերածվեցին բռնությունների, ապա նաեւ հիասթափության: Ձեր գնահատմամբ` ո՞րն է ելքն այս իրավիճակում:

- Ելքը ճիշտ ընդդիմադիր դաշտում ճիշտ կազմակերպվելու եւ ճիշտ մարտավարական քայլեր կիրառելու մեջ է: Ես մեծ հաշվով լավատես եմ եւ վստահ եմ, որ գալու է պահը, երբ մեզ` հայերիս հաջողվելու է այդ փոփոխությունը կատարել:

- Ինչպե՞ս եք դա պատկերացնում, եթե ոչ ընտրությունների կամ այլ օրինական ճանապարհներով:

- Այսօր անօրինական դաշտում գտնվում եւ այդպես էլ գործում են հենց այս ռեժիմի պարագլուխները: Նրանք են, որ հակասահմանադրական ընթացքի մեջ են գտնվում: Իսկ ընդդիմության անելիքի մասով այս պահին ավելին չեմ ուզում ասել:

- Կարծում եք, որ այս իշխանությունների դեմ պայքարում պետք է գործել նույն մեխանիզմներո՞վ, ինչպես իրենք են գործում հասարակության ու ժողովրդի դեմ, թե՞...

- Ես երբեք այդպիսի բան նկատի չեմ ունեցել եւ չունեմ, բայց ամփոփելով այս թեման` կարող եմ ասել հետեւյալը. ժողովրդին է պատկանում իշխանությունը, եւ ժողովուրդն ինչ ուզի` կանի:

- Կիսո՞ւմ եք տեսակետը, որ քանի դեռ ներքին խնդիրները լուծված չեն, որեւէ հաջողություն արտաքին ոլորտում, այդ թվում հայ-թուրքական եւ ԼՂ խնդիրներում հնարավոր չէ արձանագրել:

- Անշուշտ, կիսում եմ այդ տեսակետը, եւ այդ պատճառով մեր նախաձեռնությունը` «Սարդարապատ» շարժումը սկսելիս, ի սկզբանե հայտարարել ենք, որ մենք չենք գնալու հետեւանքները վերացնելու հետեւից` ի նկատի ունեմ հայ-թուրքական արձանագրություններն իրականություն դարձնելը կամ Արցախի հարցում զիջումները կանխելու ճանապարհով, այլ գնալու ենք պատճառները վերացնելու ուղիով, որն է` հնարավորինս շուտ երկրի ներսում ձեւավորել բարոյական իշխանություն:

- Իսկ եթե այդ ընթացքում արձանագրվեն բավականին մեծ ձախողումներ արտաքին ոլորտում, դրանից հետո, Դուք մեղավորության զգացողություն չե՞ք ունենա:

- Կարծում եմ, որ, վերջիվերջո, մեր ժողովուրդը ունի այդ ներուժը, որպեսզի կարողանա ձերբազատվել այս ընթացքից, եւ մինչ այդ եթե ինչ-որ հակահայկական փաստաթղթեր հաստատվեն, դրանք նույնպես դառնալու են անիրագործելի, ուստի այսօր արտաքին ուժերը պետք է շատ լավ գիտակցեն, որ այս ռեժիմի հետ որեւէ պայմանավորվածություն հայ ժողովրդի կողմից ընդունելի չի լինելու: Գլխավոր վավերագրողն այստեղ մեր ժողովուրդն է, որը եթե չի վավերացնում որեւէ փաստաթուղթ, անիմաստ են բոլոր ջանքերը: Հուսով եմ, որ շաբաթն ուրբաթից շուտ կգա, եւ կարիքը չի լինի ապագայում այդպիսի փաստաթղթեր չեղյալ հայտարարելու:

- Որտեղի՞ց Ձեզ այդպիսի լավատեսություն, երբ արտաքին աշխարհը, հատկապես հայ-թուրքական զարգացումներից հետո, կարծես աջակցում է Սերժ Սարգսյանի իշխանությանը:

- Լավատեսության հիմքը մեր ժողովրդի ներուժի մեջ է, որը ամեն պահ չէ, որ տեսնում ենք: Ես տեսնում եմ, որ մենք ունենք այդ դրական ներուժը, որն այսօր կարող է մակերեսին չի երեւում, սակայն այդ լիցքը մենք ունենք: Մեզ մնում է մի փոքր կազմակերպվել, եւ կգտնվեն այնպիսի մարդիկ, որոնք կկարողանան այդ լիցքը տեղից շարժել:

Արթուր Խեմչյան