 |
Ժիրայր Սեֆիլյան. - "Սա ուղղակի հալածանք է "
Azatutyun
11/12/08
"Ժիրայր
Սեֆիլյանը չի բավարարում Հայաստանի Հանրապետության քաղաքացիության մասին օրենքի
բոլոր պահանջներին եւ քանի որ իրավասու մարմինները` տվյալ դեպքում
արտգործնախարարությունը, ոստիկանությունը եւ ազգային անվտանգության
ծառայությունը նպատակահարմար չեն գտնում դիմողի քաղաքացիություն ստանալը, ուստի
նախագահին առընթեր քաղաքացիության հարցերի հանձնաժողովը մերժել է Ժիրայր
Սեֆիլյանի դիմումը ", - այսօր "Ազատություն " ռադիոկայանին փոխանցեց
արդարադատության նախարարի մամուլի խոսնակ Լանա Մշեցյանը:
Շուշիի առանձնակի գումարտակի հրամանատար, լիբանանահայ Ժիրայր Սեֆիլյանն արդեն
յոթ տարի փորձում է Հայաստանի քաղաքացիություն ստանալ:
Անցած նոյեմբերի 28-ին նախագահ Սերժ Սարգսյանը մերժել է Ժիրայր Սեֆիլյանի
դիմումը Հայաստանի քաղաքացիություն ստանալու մասին: Սա քաղաքացիություն
ստանալու վերաբերյալ Արցախյան պատերազմի վետերանի երրորդ դիմումն էր Հայաստանի
նախագահին: Նախորդ երկու դիմումները մերժել էր նախկին նախագահ Ռոբերտ Քոչարյանը:
"Պետք է հիմնավորե'ն. սա պետական գաղտնիք չէ ", - "Ազատություն "
ռադիոկայանի հետ զրույցում ասաց Սեֆիլյանը` պնդելով, որ քաղաքացիություն
ստանալու իր դիմումները մերժվել են առանց որեւէ հիմնավորման: - "Սա
ուղղակի հալածանք է: Այսինքն` չենք տա քեզ, չես լսում մեզ, մենք քեզ անընդհատ
ասել ենք, որ խելքդ գլուխդ հավաքի, ի՞նչ գործ ունես ընդդիմության հետ եւ այլն:
Չես անի, ուրեմն քեզ այսպես կպատժենք ", - մեկնաբանեց Սեֆիլյանը:
Ռուզաննա Ստեփանյան