Բոլորին պետք է մաքրվելու հնարավորություն տալ. այդ թվում` ՀՅԴ-ին

Ժամանակ 05/06/09

Երեւանի ավագանու ընտրություններից առաջ հրավիրված ասուլիսում Հայ Ազգային Կոնգրեսի անդամ Ժիրայր Սեֆիլյանը հայտարարել էր ՀԱԿ-ի մշակած մարտավարական մի քանի դրույթների մասին, որոնք պետք է կիրառվեին ընտրությունների օրը` «թվանկարչությունը» կանխելու եւ ընտրակեղծիքների դեմ պայքարելու համար:

 Դրույթներից մեկն էլ քվեարկությունից հետո Կենտրոնական ընտրական հանձնաժողովը պաշարելն էր` այնքան ժամանակ, «մինչեւ «մեր ականջին հաճելի արդյունքը լսենք»: Ժ.Սեֆիլյանից հետաքրքրվեցինք, թե ինչո՞ւ խոստման համաձայն չպաշարեցին ԿԸՀ-ն, արդյո՞ք այն պատճառով, որ այդ մարմնի հրապարակած «արդյունքը» հաճելի է եղել նախաձեռնության հեղինակների ականջին:  

- Այդ որոշումը անձամբ իմ շուրթերից է հնչել, սակայն ինձ համար անակնկալ էր Լեւոն Տեր-Պետրոսյանի` մայիսի 31-ի գիշերը կայացրած որոշումը, ըստ որի ժողովուրդը չպետք է հավաքվի ԿԸՀ-ի դիմաց: Այնպես որ, այդ հավաքը տեղի չունեցավ ինձանից անկախ: Եվ եթե տեղի ունենար, կարծում եմ` բոլոր գործերն այսօր այլ ընթացք կունենային:  

- Ինչո՞վ է ամրապնդվում Ձեր ենթադրությունը, կարծում եք` ԿԸՀ-ն տեղի՞ կտար հավաքվածների ճնշումներին եւ այլ արդյո՞ւնք կհրապարակեր:

- Ժողովրդի ճնշումները հնարավոր չէ, որ իշխանություններն արհամարհեն, հնարավոր չէ, որ չազդեն վերջիններիս գործողությունների վրա: Եթե հիշում եք, 2003 թվականին իշխանությունները փորձում էին նախագահական ընտրությունները մեկ փուլով անցկացնել, սակայն երբ ժողովուրդը հավաքվեց ԿԸՀ-ի շուրջ, ուշ գիշերին որոշում ընդունվեց երկրորդ փուլի անցկացման մասին: Այս անգամ, սակայն, դա, դժբախտաբար, չկրկնվեց:

- Դուք` «Հայ կամավորականների համախմբում» նախաձեռնությունը, ՀԱԿ-ի այն թեւն եք ներկայացնում, որն ավելի արմատական քայլերի, գործողությունների կողմնակիցն է: Ինչպե՞ս է ստացվում ձեր համագործակցությունը այն քաղաքական ուժի հետ, որը բացառապես սահմանադրական ճանապարհով իշխանափոխության հասնելու կողմնակից է:

- Ռադիկալ, վճռական գործողություն ասվածի տակ մենք նկատի չունենք հակասահմանադրական գործողությունների գնալը, եւ մեր պատկերացրած վճռական գործողությունը լիովին տեղավորվում է ժողովրդավարության, օրինականության փիլիսոփայության պատյանում: Մենք այնպես չէ, որ արտառոց բաներ ենք առաջարկում, մեր առաջարկներն այնպիսին են, որոնք մինչեւ այժմ ՀԱԿ-ի կողմից կատարվել են, կամ` կիսով չափ են կատարվել: Թե ինչ ասել է վճռական գործողություն` ես, եթե ինձ ժամանակ տաք, ավելի մանրամասն կասեմ մեկ շաբաթ անց:

- Ինչպես ՀԱԿ անդամ Լեւոն Զուրաբյանը հայտարարեց` իշխանությունները ընդդիմության հետ խոսում են ոչ թե քվեաթերթիկների, այլ` ավտոմատների լեզվով: Նման իրավիճակում ՀԱԿ-ի մարտավարությունը` իշխանություններին հյուծելու միջոցով հասնել իշխանափոխության, ի վիճակի կլինի՞ հաջողություն արձանագրել:

- Մենք միշտ ասել ենք, որ բռնատիրական ռեժիմի օրոք ընտրությունների միջոցով հնարավոր չէ հասնել արդյունքի: Իսկ որ այս իշխանությունները հյուծվելու ու վերանալու են` հաստատ է, անկախ նրանից, թե այսօրվա ընդդիմությունը կլինի՞, թե՞ ոչ: Ուստի մենք` «Հայ կամավորականների համախմբումը», այն մտքին չենք, թե պետք է սպասենք, թե երբ են հյուծվում, վերջանում, որ հետո միայն լինի փոփոխություն: Պիտի ներազդել այդ հյուծման պրոցեսի վրա, որպեսզի այն հնարավորինս արագ լինի... Երբ մի իշխանություն, որը ժողովրդի մեծամասնության կողմից ոչ թե չի ընդունվում, այլ ատելության է արժանանում, ես համոզված եմ, որ մի օր փոխվելու է: Ամբողջ խնդիրը հենց նրա մեջ է, թե ով է փոխելու այն: Եթե մենք` ընդդիմությունս, ճիշտ չգործենք եկող ժամանակահատվածում, լինելու է իշխանափոխություն, բայց ոչ մեր ուզած ձեւով ու մեր ուզած մարդկանցով:

- ՀԱԿ-ը բոլոր առողջ ուժերին, այդ թվում` եւ ՀՅԴ-ին, համախմբվելու կոչ արեց: Որպես նախկին դաշնակցական, ինչպե՞ս եք վերաբերվում այդ հայտարարությանը, նկատի ունենալով ՀՅԴ-ի, մեղմ ասած, ոչ բարեհաճ վերաբերմունքը հատկապես Լ.Տեր-Պետրոսյանի նկատմամբ: Նաեւ` ՀՅԴ-ի ոչ վաղ անցյալը:

- Շատ ճիշտ հայտարարություն եմ դիտարկում, եւ ես հնարավոր բոլոր առիթներն օգտագործել եմ` հորդորելու Դաշնակցությանը համագործակցել ընդդիմության հետ: Մենք չենք ասում` միացեք, այլ` համագործակցեք: Որովհետեւ երբ որ երկիրը օկուպացվում է օտար ուժերի կողմից, երկրի ներսում առկա բոլոր քաղաքական միավորները պետք է միառժամանակ իրենց քաղաքական տարաձայնությունները մի կողմ դնեն ու համագործակցեն օկուպանտից ձերբազատվելու համար: Հենց այս նպատակով էլ պիտի տեղի ունենա համագործակցությունը:

- Եթե ոչ միավորվելու, ապա ի՞նչ ձեւաչափով պետք է տեղի ունենա համագործակցությունը: Եվ արդյո՞ք ՀՅԴ-ն իսկապես առողջ ուժ է:

- Բոլորին էլ պետք է մաքրվելու հնարավորություն տալ, այդ թվում` եւ ՀՅԴ-ին: Եթե քաղաքական ուժը տեսնում է, որ իր ընթացքը սխալ է եւ դուրս է գալիս կոալիցիայից, ապա պետք է այդ մարդկանց հնարավորություն տալ: Եթե այդ մարդիկ ներկա ռեժիմի պարագլուխների հետ չեն շաղախվել մարտի 1-ի արյունարբու գործողություններում, ապա, ինչո՞ւ չէ, պետք է առիթ տալ: Բոլորս պետք է մտածենք մեր երկրի ապագայի մասին, եւ անցյալն այնքան կարեւոր չէ, քան այսօրը, այն, թե ինչ ես ուզում դու այսօր:

- Որպես նախկին ՀՅԴ-ական, ով քաջ ծանոթ է այդ կուսակցության մենթալիտետին, ի՞նչ եք կարծում, ՀՅԴ-ն իր մեջ ուժ կգտնի՞ մաքրվելու, համագործակցելու ընդդիմության հետ:

- Երբ ես կոչ եմ անում, ուրեմն համագործակցության ներուժ տեսնում եմ: Բայց համոզված չեմ` այն կլինի, թե ոչ: Եթե լինի այդ համագործակցությունը, ապա մոտ օրերս պետք է արձանագրվի, իսկ հետո` ժամանակը ցույց կտա:

- Իսկ Դուք պատրա՞ստ եք կամուրջ դառնալ ՀԱԿ-ի եւ ՀՅԴ-ի միջեւ:

- Ոչ միայն ՀՅԴ-ի եւ ՀԱԿ-ի: Առհասարակ, ես պատրաստ եմ ամեն կերպ աջակցել ընդդիմությանը, որ ճակատում էլ որ դա լինի:

Երբ երկիրը օկուպացվում է օտար ուժերի կողմից, երկրի ներսում առկա բոլոր քաղաքական միավորները պետք է միառժամանակ իրենց քաղաքական տարաձայնությունները մի կողմ դնեն ու համագործակցեն օկուպանտից ձերբազատվելու համար: