ՈՐՁ ԵՎ ԷԳ ՎԻՃԱԿ

,Դաշնակցության ընդդիմադիր նկրտումները տակավին անկեղծ չեն: Ինչպե՞ս կարող է մեր երկրում լինել ընդդիմադիր ուժ, որը սեփական հեռուստակայան ունի: Այն օրը, երբ մենք լսենք, որ ,Երկիր մեդիանե փակվել է, այդ օրը ես կհավատամ, որ Դաշնակցությունն իրական ընդդիմություն է դարձել: Երբ ,Միացումե նախաձեռնությունը միջոցառումներ էր անում, եւ Հ1-ը կամ ,Շանթըե չէին լուսաբանում, դա հասկանալի էր: Բայց ինչո՞ւ իրեն ընդդիմադիր համարող ,Երկիր մեդիանե նույնպես չի լուսաբանում: Կամ թե՝ Դաշնակցության կազմակերպած ստորագրահավաքը. ինչո՞ւ միայն Հանրապետության հրապարակում: Ինչո՞ւ այլ տեղերում չարեցին: Եթե նրանք անկեղծ էին, կարող էին մեկ կետի փոխարեն ստորագրահավաք անել 30 կետում: Ոչ ոքի համար գաղտնիք չէ, որ նրանք կազմակերպական նման ...

 -Պարոն Սեֆիլյան, Հայ հեղափոխական դաշնակցությունը պատրաստվում է հունվարի 12-ին  բողոքի ակցիաներ կազմակերպել: Հնարավո՞ր է, որ դուք ևս միանաք Դաշնակցությանը:

-Ոչ, որովհետև մեր և այսօրվա Դաշնակցության ղեկավարության պատկերացումները շատ հարցերում տարբերվում են: Դաշնակցությունը կողմ է առանց նախապայմանների Թուրքիայի հետ հարաբերությունների հաստատմանը, իսկ մենք` դեմ ենք: Ուստի համագործակցությունը հնարավոր չէ:

-Նկատենք, որ ՀԱԿ-ի անդամների գերակշիռ մասը նույնպես կողմ է Թուրքիայի հետ  առանց նախապայմանների հարաբերությունների հաստատմանը:

-Դաշնակցությունն ու  Տեր-Պետրոսյանն այս հարցում իրար նման են, իսկ մեր մոտեցումները այս հարցում էապես տարբերվում են և’ Դաշնակցության և’ ՀԱԿ-ի մոտեցումներից: Եվ այնուամենայնիվ, Դաշնակցության ընդդիմադիր  նկրտումները տակավին անկեղծ չեն: Ինչպե՞ս կարող է մեր երկրում լինել ընդիմադիր ուժ, որը սեփական հեռուստակայան ունի: Այն օրը, երբ մենք լսենք, որ □Երկիր մեդիան□ փակվել է, այդ օրը ես կհավատամ, որ Դաշնակցությունն իրական ընդդիմություն է դարձել: Երբ □Միացում□  նախաձեռնությունը միջոցառումներ էր անում և Հ1-ը կամ □Շանթը□ չէին լուսաբանում, դա հասկանալի էր:  Բայց ինչո՞ւ իրեն ընդդիմադիր համարող □Երկիր մեդիան□ նույնպես  չի լուսաբանում: Կամ թե` Դաշնակցության կազմակերպած ստորագրահավաքը. ինչո՞ւ միայն Հանրապետության Հրապարակում: Ինչո՞ւ այլ տեղերում չարեցին: Եթե նրանք անկեղծ էին, կարող էին մեկ կետի փոխարեն ստորագրահավաք անել 30 կետում: Ոչ ոքի համար գաղտնիք չէ, որ նրանք կազմակերպական նման հնարավորություն ունեն: Եվ այդ դեպքում ՀՀ նախագահի պաշտոնը զբաղեցրած անձի սեղանին կլիներ ոչ թե 50 հազար, այլ մեկ միլիոն ստորագրություն, որի հետ նա, որքան էլ ուզենար, չէր կարող հաշվի չնստել: Ուստի, Դաշնակցության  ոչ անկեղծ լինելու  իրողությունը, որձևէգ այս վիճակն  է պատճառը, որ մենչ չենք համագործակցում նրանց  հետ: Մեր համագործակցության պայմաններից է նաև Դաշնակցության կողմից քոչարյանական ռեժիմի ճշգրիտ գնահատական տալը: Եթե մինչև ամսի 12-ը անկեղծանան` խնդրեմ:

-Ինչպե՞ս եք գնահատում Հայ-թուրքական հարաբերությունների հաստատման  վերջին մեկ ամսվա գործընթացքը:

-Հայ-թուրքական հարաբերությունների մասին խոսելիս պետք է նկատենք, որ այդ սիրախաղը սկսվեց  մեկ տարի առաջ, և ոչ թե ավելի վաղ: Ինչո՞ւ: Այն պատճառով, որ մեր երկրում տեղի ունեցավ մարտի 1, որից հետո մեր երկիրն այնքան թուլացավ, որ հակառակորդը որոշեց այս առիթը բաց չթողնել: Եվ այս խաղի վերջն ինչպիսին էլ լինի` միևնույն է, այն լինելու է ի վնաս հայերի:  Այսօր Վրաստանն ամբողջովին Արևմուտքի ազդեցության տակ է, Ադրբեջանը` կիսով չափ: Միայն Հայաստանն է մնացել:  Ուստի, այսօր Հայաստանի խոսքը շատ ավելի է արժևորվում, քան նախկինում:  Կարելի է ասել` այն ամբողջ տարածաշրջանի ապագայի տեսանկյունից  վճռորոշ նշանակություն ունի:  

-Իսկ ի հաշիվ ինչի՞ է Հայաստանի խոսքն այսօր դարձել ավելի արժեքավոր: Արդյո՞ք դա պայմանավորված չէ վերջին  շրջանում ՀՀ իշխանությունների վարած  նախաձեռնողական արտաքին քաղաքականությամբ:

- Այդ արձանագրությունները մի կարծեք թե ստեղծվել են վերջին մեկ տարվա ընթացքում: Ես համոզված եմ, որ  այդ արձանագրությունները` մի ստորակետ այս կողմ, մի ստորակետ այն կողմ, թուրքական գզրոցներում  գոյություն են ունեցել վաղուց: Ուստի, այս գործընթացը որևէ կապ չունի Ձեր նշած ՀՀ իշխանությունների նախաձեռնողական քաղաքականության հետ: Բացի այդ, միանշանակ է, որ հայ-թուրքական հարաբերությունների և Արցախի խնդիրը մեկ փաթեթում են, և թուրքերը երբեք չեն հրաժարվի իրենց բազմիցս բարձրաձայնված այս մոտեցումից: Իսկ Արցախի հարցում, գիտեք, նրանց ուզածը ազատագրված տարածքների կորզումն է մեզանից: Սակայն եթե նման բան տեղի ունենա, ապա այն հանրապետությունիկը, որը մենք այսօր ունենք` նկատի ունեմ Հայաստանի Հանրապետությունը, մի քանի տարի հետո պարզապես կդադարի գոյություն ունենալուց: Ուստի, ինչքան շուտ այս ընթացքը վիժեցվի, այնքան լավ մեզ համար:

 - Ինչպե՞ս եք պատկերացնում  գործընթացի վիժեցումը:

-Այս գործընթացի վիժեցման հիմնական բանաձևը մեր երկրում բարոյական իշխանության ձևավորումն է: Պետք է պայքարել ոչ թե հետևանքի` այս արձանագրությունների և այլնի, այլ բուն պատճառի` այս իշխանությունների դեմ: Հենց այդ նպատակով էլ մենք նախաձեռնել ենք □Սարդարապատ□ շարժումը, որը լինելու է անկուսակցականների շարժում, քանի որ Հայաստանում քաղաքական կուսակցություններն ու քաղաքական դաշինքներն իրենց սպառել են:

-ՀԱԿ-ը նույնպե՞ս:

-Այո, դժբախտաբար ՀԱԿ-ը ձևավորվեց որպես դաշինք կուսակցությունների, իսկ մենք ի սկզբանե առաջարկել էինք սառեցնել կուսակցությունների անդամների գործունեությունը և միաձուլվել ՀԱԿ-ին: Դա տեղի չունեցավ: Ինչ վերաբերվում է ինձ, ես ավելի շատ համաժողովրդական շարժմանն եմ  իմ անդամակցությունը պատկերացրել, և ոչ թե ինչ-որ քաղաքական մարմնի: Ինչ վերաբերվում է □Սարդարապատին□, ապա  համոզված ենք, որ մեր ժողովրդի գերակշիռ մասը հոգու խորքում մեր գաղափարների կրողն է, ուստի մենք չենք կասկածում, որ որոշ ժամանակ անց մեզ հաջողվելու է մոբիլիզացնել մեր ժողովրդին` վերացնելու համար ոչ թե հետևանքը` հայ-թուրքական արձանագրությունները կամ Մադրիդյան սկզբունքները, այլև  բուն պատճառը` ի դեմս այսօրվա իշխանությունների:  

-Երկու տարի առաջ մեզ տրված Ձեր հարցազրույցում Դուք  կարծիք հայտնեցիք, որ եթե հրապարակում հավաքվի 100 կամ 200 հազար մարդ, ապա ոչ մի իշխանություն չի համարձակվի դեմ դուրս գալ այդ կամքին: Հիմա է՞լ եք այդպես կարծում` աչքի առաջ ունենալով մարտի 1-ը:

-Դա կախված է ընդդիմության առաջնորդի վճռականությունից և կամային հատկություններից: Եթե ժողովրդին առաջնորդող օղակում գերիշխում է նվիրվածությունն ու ընդհանուրի համար զոհողության գնալու պատրաստակամությունը, ապա ոչ մի զորք չի համարձակվի կանգնել այդ ուժի առաջ:

-Ստացվում է, որ մարտի 1-ին ընդդիմության կողմից նման հատկանիշներ չդրսևորվեցի՞ն:

-Ես տվեցի ընդհանուր բանաձևը: Ես չեմ ուզում դատաքննել մարտի 1-ը, բայց փաստն այն է, որ ընդդիմությունը համապատասխան քայլերը չկատարեց: