Նորաստեղծ ՚Միացում'ի Մամուլի Ասուլիսը

Միացումը Ստեղծվեց

Lragir.am 30/10/08 

“Հայաստանի անկախությունը եւ ազատագրված միացյալ Արցախն այլեւս անշրջելի իրողություն է: Այսօր մենք, վերստին տեր կանգնելով հայոց հաղթանակող ավանդին եւ ոգուն, վերահաստատում ենք` Հայոց ազատագրված տարածքի սրբազան ամբողջականությունը պաշտպանելու, ազատագրված շրջանները վերաբնակեցնելու եւ երկրում Հայոց քաղաքակրթության անանցանելի արժեքների հիման վրա արդար, սահմանադրական եւ ժողովրդավարական պետություն կերտելու մեր մշտնջենավոր վճռականությունը”:

Այդ հայտարարության հեղինակը Միացում հասարակական նախաձեռնության հիմնադիրներն են` Զարուհի Փոստանջյանը, Ժիրայր Սեֆիլյանը, Տիգրան Խզմալյանը, Ալեք Յանիգոմշյանը, Գրիզելդա Ղազարյանը, Հրանտ Տեր-Աբրահամյանը, Սեդա Մելիքյանը, Ալեքսանդր Քանանյանը: Իրավունք դե ֆակտո ակումբում նրանք հոկտեմբերի 30-ին հայտարարել են իրենց նախաձեռնության մասին, որի նպատակը ազատագրված տարածքների պաշտպանությունն է, Ղարաբաղի հակամարտության կարգավորման ներկայիս փուլի մտահոգիչ իրողությունների հանդեպ հանրային ուշադրության կենտրոնացումը:

Նախաձեռնության հեղինակները համոզված են, որ տարածքային որեւէ զիջում հանգեցնելու է ներկայիս ռազմաքաղաքական համակարգի փլուզմանը, ուժերի հավասարակշռության խախտմանը եւ անխուսափելի է դարձնելու Ադրբեջանի ռազմական ագրեսիան:

“ՀՀ որեւէ իշխանություն պետք է իսպառ հրաժարվի Հայաստանի ազատագրված տարածքի ամբողջականությունը վտանգելու եւ երկրի պաշտպանական համակարգը ոչնչացնելու գնով իշխանական լծակները եւ տնտեսական ապօրինի մենաշնորհային արտոնությունները պահպանելու անիրագործելի մտադրությունից: Հայաստանի քաղաքական դաշտը պետք է որդեգրի սթափ եւ լրջմիտ կեցվածք`երկրի տարածքային եւ ռազմական անվտանգության նկատմամբ ներքին եւ արտաքին ցանկացած ոտնձգություն կանխելու, բացառելու եւ պատժելու ուղղությամբ”, հայտարարում են Միացումի հիմնադիրները: Նրանք հայտարարում են նաեւ. “Հայաստանի ազատագրված տարածքը չհանձնելու ցանկացած իշխանության հավաստիացումների ճշմարտացիությունն ուղիղ համեմատական է նրա վարած վերաբնակեցման քաղաքականության արդյունավետությանը”:

Նախաձեռնության հիմնադիրները նաեւ հայտարարել են, որ Հայաստանը պետք է ճանաչի Ղարաբաղի անկախությունը 1994 թվականի հրադադարին հաջորդած սահմանների առկայությամբ, Հայաստանի հետ հետագա միավորումով:

“Մենք առանց այն էլ զիջման ենք գնացել, 1994 թվականին համաձայնելով Հայաստանի եւ Ադրբեջանի առկա բաժանարար գծին: Սահմանների փոփոխությունը կհանգեցնի նոր պատերազմի, քանի որ խոսքը Արցախի ամեն մի բնակչի անվտանգության մասին է”, հայտարարել է նախաձեռնության անդամ Զարուհի Փոստանջյանը: