Արմեն Այվազյան. “Թուրքիան թշնամի հարևան է, և դա չտեսնելը վտանգավոր է”

05/09/08

“Թուրքիան ոչ թե հարևան երկիր է, այլ թշնամի հարևան, և այդ թշնամությունը չտեսնելը շատ վտանգավոր է”,– այսօր “Հայացք” մամուլի ակումբում հայ–թուրքական հարաբերությունների մասին ասել է քաղաքագիտության դոկտոր, “Արարատ” ռազմավարագիտական կենտրոնի ղեկավար Արմեն Այվազյանը՝ նշելով, որ հայ–թուրքական հարաբերություններ գոյություն չունեն, կա միայն հայ–թուրքական հակամարտություն, և կարգավորում ասվածն էլ վերաբերում է այդ ձևակերպմանը։

Քաղաքագիտության դոկտորը նշել է, որ հայ–թուրքական հակամարտության կարգավորման մասին զրույցները հասել են հիստերիայի աստիճանի, մի նշանակություն է տրվում Թուրքիայի նախագահ Գյուլի այցին, ինչն իրականում ոչ մի նշանակություն չունի, բայց արդյունքում “մենք ունենալու ենք հիասթափված մարդկանց մի զանգված”։ “Այն հեղեղը, այն քարոզչությունը, որ այսօր տարվում է հեռուստատեսություններով, ուղղակի պատերազմ է հայ ժողովրդի ռազմավարական հիշողության դեմ”,– ընդգծել է նա։

Արմեն Այվազյանի խոսքով՝ դեռ Գյուլը Հայաստան չեկած, դեռ որևէ համաձայնություն չարձանագրված, Հայաստանի իշխանությունները որդեգրել են միակողմանի և զիջումների անիմաստ և անհեռանկար քաղաքականություն, հտևողականորեն անտեսում Թուրքիայի ռազամավարական իրական նպատակներն ու հրաժարվում Անկարայի գործողություններին տալ համարժեք քաղաքական գնահատական։

tert.am (հապավումով)