Տնտեսագետներն ավելի շատ բարոյականությունից են խոսում. Տիգրան Խզմալյան

«Ինձ համար հետաքրքիր է, որ հենց մասնագետ–տնտեսագետները, որքան էլ պարադոքսալ հնչի, խոսում են ոչ այնքան տնտեսությունից, որքան բարոյականությունից։ Մենք պետք է խիզախություն ունենանք և հաստատենք, որ մեզանում հատկապես վերջին տասնամյակներում, խորհրդային ժառանգության պատճառով, որոշակի էթիկա, արդարության հիմք չկա, չկա բարոյահոգեբանական մթնոլորտ, որը ընդհանուր խոսքերից և ընդհանուր պահանջներից զատ ստանա հրամայականի ուժը»,– այսօր հայտարարեց «Միացում» նախաձեռնության անդամ, կինոռեժիսոր Տիգրան Խզմալյանը՝ ՄԻԺԻ գրասենյակում «Սարդարապատ» շարժման կազմակերպած «Խոշոր կապիտալի ազդեցությունը և այն հաղթահարելու հրամայականը» թեմայով քննարկման ժամանակ։

Տնտեսական խնդիրներին նվիրված քննարկման ժամանակ Խզմալյանը կարծիք հայտնեց, որ հարկավոր է մեր երկիրը համեմատել այն երկրների հետ, որոնք փորձեցին ճեղքում մտցնել տնտեսության մեջ։

«Հայկական ընտրություն» կազմակերպության ղեկավար Արմեն Աղայանը նշեց, թե քննարկման առանցքում ոչ թե պետք է կենտրոնանալ այն հարցի վրա, թե «ինչպես կուլակաթափ անել հարուստներին», այլ մտածել այն հարցի շուրջ, թե ինչի արդյունքում առաջացան այդ հարուստները։ Աղայանի կարծիքով՝ Հայաստանի տնտեսությանը հարկավոր են լոկոմոտիվ արտադրություններ։
Քննարկման ժամանակ տնտեսության զարգացման վերաբերյալ տարատեսակ կարծիքներ հնչեցին, բայց հիմնականում շեշտվեց այն միտքը, որ տնտեսությունն առողջացնելու համար անհրաժեշտ է քաղաքական համակարգի կայացում։

Tert.am 13.05.10