ՄԵԶ ՊԵՏՔ Է ՀԵՂԱՓՈԽՈՒԹՅՈՒՆ

ՀՀ ԱԺ Ժառանգություն խմբակցության անդամ Զարուհի Փոստանջյանի հայտարարությունը  ապրիլի 2010 թվականի ապրիլի 27-ի նիստում
 
“…Հայաստանում … ով կփորձի նման միտք փայփայել իր մտքում` ընդամենը խորհուրդ չեմ տալիս: Օրորոցում անմիջապես կպատժվի, եթե փորձի հեղափոխական ճանապարհով փորձել ինչ-որ բան փոխել: Ինքս դա չեմ ընդունում, իսկ ներքին գործերի նախարարը միջանկյալ մասում չի կարող հայտնվել, կամ-կամ”: Օրերս հնչած այս խոսքերի հեղինակը Հայաստանի Հանրապետության ոստիկանապետ Ալիկ Սարգսյանն է:
 
Այս բառերից նույնպես ակնհայտ է, որ ոստիկանության  բարձրաստիճան պաշտոնյաներն իրենց պատկերացումներով  և գործունեությամբ ներկայացնում են բռնապետական իշխանավորների և կարգերի շահերը: Նրանք չեն ժխտում, որ առաջին հերթին կոչված են պաշտպանելու  հանիրավի ռեժիմը, և դա կատարում են և հետայսու ևս իրականացնելու են ամեն գնով` կանգ չառնելով անգամ մարդկային կյանքեր զոհաբերելու առաջ: Մենք ոչ միայն ականատեսն ենք ՀՀ ոստիկանապետի կողմից բռնության հրապարակային կոչերի, այլ նաև ականատեսն ենք, թե ինչպես են ոստիկանության աշխատակիցները հարձակվում խաղաղ ցուցարարների վրա, նաև պարբերաբար տեսնում և լսում ենք ոստիկանության կողմից` թե փողոցում և թե ոստիկանական բաժանմունքներում քաղաքացիներին խոշտանգելու կամ սպանելու փաստերի մասին: Եվ այս բոլոր հանցագործությունները մնում են անպատիժ:
 
Դեռևս ինքն իրեն ներքին գործերի նախարար պատկերացնող Ալիկ Սարգսյանը, կարծում եմ, ՀՀ ոստիկանապետի պաշտոնը զբաղեցնելիս լավ կլիներ ուսումնասիրեր ՀՀ Սահմանադրությունը, միջազգային իրավական ակտերը, որոնց միացել ենք մենք:  Եվ կարդար մեր ժողովրդի պատմության փառահեղ էջերը, որոնց հեղափոխականության շնորհիվ  այսօր մենք ապրում ենք մեր Հայրենիքի մի մասում` որպես Հայաստանի և Արցախի Հանրապետությունների քաղաքացիներ: Հեղափոխություն անելը մեր իրավունքն է, ընդվզելը մեր իրավունքն է, բողոքելը մեր իրավունքն է, անօրինական իշխանություններից ազատվելը նույնպես մեր իրավունքն է: Ձեր կողմից տարածվող բռնության կոչերը մեզ չեն վախեցնում: Մենք հեղափոխական սերունդ ենք:  Մեր համար անընդունելի են բռնություն կազմակերպող և իրականացնող  ներքին գործերի նախարարները, որոնցից մեկն էլ Թալեաթն էր:
 
Մեզ այսօր անհրաժեշտ են հեղափոխական լուծումներ: Թե հեղափոխություն անելը  ոստիկանապետը կամ այլ պաշտոնյաներ ինչպես կբնութագրեն, դա իրենց խնդիրն է: Մենք չենք պատրաստվում ապրել և հանդուրժել հետամնաց այս կարգերը: Մեզ անհրաժեշտ է հեղափոխություն: Օրհասական անհրաժեշտություն է  հասարակական կյանքի արմատական փոփոխությունը, որը կվերացնի ներկայիս հասարակակկան-քաղաքական կարգը և կհիմնադրի Հայաստանի Հանրապետության Սահմանադրությամբ ամրագրված ժողովրդին պատկանող իշխանություն:

lragir.am 27.04.10