ՔՈՉԱՐՅԱՆՆ ԱՆՀԵՏԵՎՈՂԱԿԱՆ ԷՐ

Հայաստանի ԱԳՆ մամուլի նախկին խոսնակ, դիվանագետ, Կանադայում Հայաստանի նախկին դեսպան Արա Պապյանը հուլիսի 15-ին լինելով Սարդարապատ շարժման հյուրը եւ խոսելով միջազգային ասպարեզում Հայաստանի չիրացված դիվանագիտական հնարավորությունների մասին, մասնավորապես խոսել է Վիլսոնի իրավարար վճիռը դիվանագիտական զինանոցի աաջնային պլան մղելու անհրաժեշտության մասին: Արա Պապյանը ասել է, որ դա Հայաստանին տալիս է դիվանագիտական լայն հնարավորություններ եւ կարող է լինել Հայաստանի անվտանգությունը հուսալի դարձնող լրացուցիչ կարեւոր գործոն: Արա Պապյանն ասում է, թե եթե Հայաստանը Թուրքիայի հետ հարաբերություններում  այդ գործոնն աշխատեցնի, ապա Ադրբեջանը եթե նույնիսկ իր ռազմական բյուջեն 2-ից դարձնի 4 միլիարդ, ապա միեւնույն է, դա արդեն վտանգավոր չի լինի, քանի որ Թուրքիան իրավարար գործիքի խաղարկման արդյունքում կտրված կլինի Ադրբեջանից: Իսկ Ադրբեջանն առանց Թուրքիայի անկարող է որեւէ բան ակնկալել Հայաստանի հետ որեւէ պատերազմում, նշում է Արա Պապյանը:
 
Նա ասում է, որ Վիլսոնի իրավարար վճռի առումով ինքը բավական ուսումնասիրություններ կատարել եւ հարցի մեջ խորացել է այն ժամանակ, երբ երկրորդ նախագահ Ռոբերտ Քոչարյանը դիվանագիտական կորպուսի առաջ խնդիր է դրել գտնել Բաքու-Ջեյհանի կառուցումը կանխելու ճանապարհներ: Արա Պապյանն ասում է, թե այն ժամանակ ինքն առաջարկել է գործի դնել Վիլսոնի իրավարար վճիռը, որը բարձրագույն միջազգային փաստաթուղթ է` կատարման ենթակա: Պապյանն ասում է, որ միջազգային դատարանում դա խաղարկելով, հետո կարելի էր դիմել Լոնդոնի տնտեսական դատարան եւ ասել, որ Բաքու-Ջեյհանը անցնում է դե յուրե Հայաստանին պատկանող 350 կիլոմետր տարածքով, ու անհնար է դա իրականացնել առանց Հայաստանի համաձայնության:
 
Պապյանը նշում է սակայն, թե այն ժամանակ Ռոբերտ Քոչարյանը հետեւողական չեղավ այդ հարցում, ասաց, որ ճանապարհներ գտնեն, բայց հետո հետեւողական չեղավ: “Վերջում էլ ասաց դուխներդ տեղը պահեք”, նշել է Արա Պապյանը:

 Lragir.am 15.07.10