ՀԱՆԴԻՊՈՒՄ ԿՈՒՍՏՈՒՐԻՑԱՅԻ ՀԵՏ

Առաջին անգամ Հայաստանում է աշխարհահռչակ կինոռեժիսոր, սցերարիստ եւ երաժիշտ Էմիր Կուստուրիցան The No Smoking Orchrstra խմբի հետ, որի կիթառահարն է: Ռեժիսորին նախեւառաջ Հայաստան է բերել հետաքրքրասիրությունը, բայց այստեղ գալուց հետո նրա համար պարզ դարձավ, որ Հայաստանում ճանաչված լինելը իր համար շատ ավելին է նշանակում, քան Միացյալ Նահանգներում ճանաչված լինելը, որովհետեւ այստեղ պատմության բոլոր շերտերն է հասկանում. «Մեր պատմական  ենթագիտակցությունը շատ նման է իրար, ահա թե ինչու են հասկանցել իմ ֆիլմերը եւ գնահատել իմ երաժշտությունը», նշում է սերբ կինոռեժիսորը` ավելացնելով, որ մենք եւ իրենք մշակույթի նկատմամբ նմանօրինակ մոտեցում ունեն: «Դուք ցեղասպանությամբ եք հաղթել, մենք էլ Երկրորդ աշխարհամարտի ընթացքում ցեղասպանության զոհ դարձանք, բայց նաեւ մենք, ինչպես եւ դուք աշխարհում սփռված մարդիկ ունենք, որոնք ներկայացնում են մշակույթը: Եվ երբ ես իմ ֆիլմերը նկարում եմ, մտածում եմ, որ դրանք կընկալվեն ձեր կողմից այնպես, ինչպես ընկալվում են սերբերի կողմից: Դրա համար երբ ասում եմ` երջանիկ եմ, որ այստեղ եմ, սրանք սոսկ խոսքեր չեն», նշում է Կուստուրիցան:
 
Կուստուրիցան նշում է, որ փոքր ազգերը, ինչպիսին հայերն ու սերբերն են,պիտի հասկանան, որ եթե փոքր ազգից ես սերում, նշանակում է պետք է ավելի կրթված լինես: Ասում է` Փարաջանով-արվեստագետին իր ամբողջ էությամբ բացահայտեց, երբ այցելեց թանգարան: Ըստ նրա` Փարաջանովի «Կորուսյալ նախնիների ստվերները» աշխարհում երբևէ նկարահանված լավագույն ֆիլմերից մեկն է. «Երեկ ինձ այնպես էի զգում, կարծես ես ֆիլմի ներսում լինեի: Իմ կյանքում ունեցած ամենաանհավանական ընթրիքն էր», ասում է ռեժիսորը, ով այցելել է Փարաջանովի թանգարան:
 
Հարցին` ինչու իր ֆիլմերը «Օսկարի» չեն մասնակցում, պատասխանում է. «Օսկարի օտարերկրյա ֆիլմերին հատկացված տեղը  գաղափարախոսականացված է , Հոլիվուդը Ամերիկայի քաղաքական վարչակազմի ամենաուժեղ գործիքներից մեկն է, ես էլ փոքր, համը հանող ազգից եմ, եւ հույս ունեմ, որ իմ ֆիլմերն այնքան «լավը» չեն, որ իրենց պետք լինեն, դրա համար էլ չեմ ներկայացնում»:
 
Նշենք, որ Կուստուրիցան 9 գեղարվեստական եւ վավերագրական ֆիլմերի հեղինակ է: Նրա  «Երբ հայրիկը մեկնել էր գործուղման» ֆիլմն արժանացել է Կաննի միջազգային կինոփառատոնի «Ոսկե արմավ» մրցանակին:  Նա ոչ մի անգամ որևէ փառատոնից առանց մրցանակի չի վերադարձել:

05.03.10 lragir.am