PFA ՀՐԱՊԱՐԱԿԵԼ Է ԶԵԿՈՒՅՑԸ

Policy Forum Armenia (PFA) կազմակերպությունը երեկ Վաշինգտոնում մեկնարկած իր Երկրորդ տարեկան համաժողովում հրապարակեց «Հայաստան-Սփյուռք հարաբերություններ. Անկախությունից 20 տարի անց» զեկույցը, որով PFA-ն ազդարարում է ազգային զեկույցների շարքի սկիզբ:
 
Բացման խոսքով հանդես եկավ Բրուքինգսի հաստատության ավագ գիտաշխատող Դանիել Կաուֆմանը: Նա նշեց, որ որեւէ երկրի բարեկեցություն կախված է լավ կառավարումից եւ հակակոռուպցիոն քաղաքականությունից, իս արտաքին գործոններից կախումը սովորաբար չափազանցված է: Չկան տնտեսական հրաշքներ, կան ազգային նվաճումներ, ասաց դոկտոր Կաուֆմանը:
 
PFA-ի զեկույցը անդրադարձ է Հայաստանի եւ աշխարհասփյուռ հայության միջեւ հարաբերություններին: Այն փորձ է անում գնահատել Հայաստանի եւ սփյուռքի համար՝ զարգացման եւ անվտանգության խնդիրների առկա վիճակն ու հեռանկարները: Զեկույցը գնահատում է հայ ժողովրդի երկու մասերի փոխներգրավվածությունը վերջին երկու տասնամյակում: Սփյուռքի ներգրավվածությունը Հայատանի կյանքում դիտարկվում է երեք հարթությունում՝ տնտեսական զարգացում, կառավարում եւ հանրային սեկտորի բարեփոխումներ, քաղաքացիական հասարակության կայացում: Գիտակցելով Հայաստանին աջակցելու համար անկախության վաղ շրջանում պահանջված ջանքերն ու արված զոհողությունները՝ զեկույցը քննադատական հայացք է նետում նշված կարեւոր հարթություններում ունեցած ձեռքբերումների վրա եւ վերլուծում է ստացված արդյունքների պատճառները: Վերջապես, զեկույցն առաջարկում է համատեղ գործունեության ծրագիրը, որը ճիշտ արժեքների եւ նպատակների որդեգրման եւ պատշաճ կիրառման դեպքում կօգնի դիմակայել հայ ժողովրդի առջեւ ծառացած՝ զարգացման եւ աշխարհաքաղաքական մարտահրավերներին:
 
Զեկույցը համաժողովում ներկայացրեցին PFA-ի թիմի անդամները՝ Ասպետ Գոչիկյանը, Դավիթ Գրիգորյանը, Էդգար Մարտիրոսյանըեւ Զավեն Քալաջյանը: Քննարկումը վարում էր Հայաստանում ԱՄՆ-ի նախկին դեսպան Ջոն էվանսը: Զեկույցի եւ ընդհանուր թեմայի շուրջ տեսակետներ փոխանակեցին ԱՄՆ-ում ՀՀ առաջին դեսպան, Թաֆթս համալսարանի պրոֆեսոր Ռուբեն Շուգարյանը եւ Կանադացի դոկտոր Ռազմիկ Փանոսյանը, ինչպես նաեւ համաժողովի այլ մասնակիցներ:
 
«Հայաստան-Սփյուռք հարաբերություններ. Անկախությունից 20 տարի անց» զեկույցն առաջինն է PFA-ի մեկնարկած ազգային զեկույցների շարքում: Կազմակերպությունը նախկինում հրապարակել է Հայաստանին վերաբերող մի շարք այլ զեկույցներ (տես կից):
 
Հայաստան-սփյուռք հարաբերություններին վերաբերող խնդիրների քննարկումն այսօր կշարունակվի PFA-ի Երկրորդ տարեկան համաժողովում: Այսօր՝ մարտի 1-ին, հատուկ ուղերձով հանդես կգա ՀՀ արտաքին գործերի առաջին նախարար, «Ժառանգություն» կուսակցության հիմնադիր Րաֆֆի Հովհաննիսյանը: Զեկուցողների թվում են Փարիզի Պանթեոն-Ասսաս համալսարանի իրավագիտության պրոֆեսոր Քեթրին Քեսեջյանը, Կանադյում ՀՀ նախկին դեսպան, «մոդուս Վիվենդի» կենտրոնի նախագահ Արա Պապյանը, ՀՀ ԱԺ պատգամավորներ Լարիսա Ալավերդյանը եւ Արծվիկ Մինասյանը:

01.03.10 lragir.am
 
Զեկույցը կհրապարակվի PFA-ի պաշտոնական կայքէջում (www.pf-armenia.org):