Ա. Ենիգոմշյան. 2216 բանաձևը` «խիստ վտանգավոր»

«2216 բանաձևն առաջին հերթին հետևանքն է մեր արտաքին դիվանագիտական անգործության, երկրորդ հերթին` հայկական խորհրդարանական դիվանագիտության, երրորդ հերթին` եվրոպայում հայկական լոբբինգի, որը ևս թերացած է իր աշխատանքների կատարման մեջ»,- կարծում է ազատամարտիկ, «Մոնթե Մելքոնյան» հիմնադրամի տնօրեն Ալեք Ենիգոմշյանը, ով ընդունված բանաձևը «խիստ վտանգավոր որակեց»:

Ըստ Ա. Ենիգոմշյանի, այս բանաձևի նախագիծը «չի պարունակել հայկական կողմի համար այն հիմնական բացասական դրույթները, որոնց մենք ծանոթ ենք, այն է` բանաձևը «պահանջում է հայկական ուժերի անհապաղ հեռացումը բոլոր «ադրբեջանական գրավված տարածքներից»», ինչպես նաև «Հարավային Կովկասի հակամարտությունների գործի մեջ Ռուսաստանի և ԱՄՆ կողքին դերակատարություն է շնորհվում Թուրքիային»:

«Այս 2 ամենաբացասական կետերը տեղ չեն գտել բուլղար Եվգենի Կիրիլովի ներկայացրած զեկույցի առաջին նախագծում, որը պաշտոնապես ներկայացրել է սույն թվականի հունվարի 11-ին, ինչը երեք ու կես ամիս մշակման է ենթարկվել, ապրիլի 23-ին հաստատվել է գլխադասային հանձնաժողովի նիստում և միայն մայիսի 20-ին հաստատվել է Եվրախորհրդարանի լիագումար նիստում»,- մանրամասնեց Ա. Ենիգոմշյանն ու հավելեց, որ «հսկայական տարբերություն գոյություն ունի հունվարի 11-ին ներկայացված զեկույցի և հանձնաժողովի հաստատածի միջև, որը համարյա ամբողջությամբ հաստատվել է լիագումար նիստի կողմից»:

Ա. Ենիգոմշյանի խոսքերով` հունվարին ներկայացված նախագծում կային դրույթներ, որոնք ունեցել են պրոհայկական երանգներ: Այդ թվում նա նշեց, որ «զեկույցում ակնարկություն էր կատարվում Լեռնային Ղարաբաղի դե ֆակոտ իշխանություններին անցումային փուլում լեգիտիմ կարգավիճակ շնորհելու մասին, ինչն ամբողջությամբ բացակայում է ընդունված բանաձևում»:

aysor.am 26.05.10