Պատասխան տվեք

Շուշիի առանձնակի գումարտակի հրամանատար, նախկին քաղբանտարկյալ, Հայ ազգային կոնգրեսի անդամ Ժիրայր Սեֆիլյանի Եվրոպական դատարանին ներկայացրած դիմումի առնչությամբ ԵԴ-ն ՀՀ կառավարությանն է ուղարկել հարցերի իր ցանկը:

Այս մասին մեր թղթակցին տեղեկացրել է Ժիրայր Սեֆիլյանի պաշտպան փաստաբան Վահե Գրիգորյանը: Երբ ԵԴ դիմումի հետ կապված կոմունիկացիան սկսվում է, նշանակում է, որ մի քանի ամսից դատարանը կարող է նաեւ վճիռ կայացնել: Հիշեցնենք, որ Սեֆիլյանը ձերբակալվեց 2006-ի դեկտեմբերի 9-ին` հակասահմանադրական կոչեր անելու եւ ապօրինի զենք պահելու մեղադրանքով: Վերջին մեղադրանքով էլ նա դատապարտվեց մեկուկես տարվա ազատազրկման: Իսկ իբրեւ ապօրինի զենք ներկայացվեց նրան` Շուշիի առանձնակի գումարտակի հրամանատարին, որպես պարգեւ տրված ատրճանակը: ՀՀ կառավարությանն ուղարկված հարցերը ստացվել են հունվարի 23-ին: Դրանք Ժիրայր Սեֆիլյանի դեմ հարուցված գործի քննության ժամանակ տեղի ունեցած իրավախախտման փաստերի վերաբերյալ են, որոնց առնչությամբ ԵԴ-ն կառավարությունից պահանջել է բացատրություններ ներկայացնել:

ՀԺ - Հունվար 27, 2010

armtimes.com