«Բացի զիջողներից ուրիշ զիջելու բան չունենք»

Շուշիի առանձնակի գումարտակի նախկին հրամանատար Ժիրայր Սեֆիլյանին չի զարմացանում, որ ԼՂ հարցում տարածքներ զիջելու մասին Սերժ Սարգսյանը հայտարարություններ է անում ՀՀ-ից դուրս' արտերկրյա իր այցերի ընթացքում: 

 «Երբ Ղարաբաղի ժողովուրդը ստանա իր ինքնորոշման իրավունքն իրագործելու իրական հնարավորություն և ստեղծվեն անվտանգության և զարգացման գործնական մեխանիզմներ, հայկական կողմի փոխզիջում կարող է դիտվել Ղարաբաղի շուրջ գտնվող այդ շրջանների վերադարձն Ադրբեջանին, իհարկե, պահպանելով Լեռնային Ղարաբաղն ու Հայաստանը կապող միջանցքը»,-  Սիրիա կատարած իր այցի ընթացքում «Al Vatan» թերթին ասել է Սերժ Սարգսյանը:

«Բովանդակային իմաստով Սերժ Սարգսյանը մեզ ոչ մի նոր բան չի ասել: 1999թ. հոկտեմբերի 27-ից հետո իշխանական հատվածում ԼՂ հարցում որեւէ տեսակետ չի փոխվել»,- այսօր «Ա1+»-ին ասաց Ժիրայր Սեֆիլյանը:

 1999թ. հոկտեմբերի 27-ը նա շրջադարձային է համարում ԼՂ հարցում:  Սեֆիլյանը հիշեցրեց, որ Հոկտեմբերի 27-ի ոճրագործությունից ընդամենը մի քանի ամիս հետո  2000թ. սկզբին  Ռոբերտ Քոչարյանն իր մոտ է հրավիրել մի քանի մտավորականների. «Քոչարյանը մտավորականներին խնդրել է շրջանառության մեջ դնել այն միտքը, որ 1988թ. մենք' հայերս, ցանկանում էինք, որ Ղարաբաղը միանա Հայաստանին: Քոչարյանը, այսպես ասած, գլուխ գովելով' ասել է, թե այսօր ԼՂՀ-ը գումարած Լաչինը միացնում ենք Հայաստանին, էլ ի՞նչ եք ուզում: Քոչարյանը սկսեց այս արշավը, որը շարունակում է Սերժ Սարգսյանը»:

 Ընդհանրապես. ԼՂ հարցում զիջումներ ակնկալողներին Սեֆիլյանը հարկ համարեց մեկ անգամ եւս իրազեկել. «ԼՂ հարցում, մենք հայերս, բացի զիջողներից ուրիշ ոչինչ չունեք զիջելու»:

Սեֆիլյանը նաեւ հիշեցրեց, որ ՀՀԿ-ն' իր առաջնորդի' Սերժ Սարգսյանի հետ, որն այսօր խոսում է փոխզիջումների մասին, մինչեւ 1999թ. հոկտեմբերի 27-ը ԼՂ հարցում առաջնորդվում էր «ոչ մի թիզ հող» կարգախոսով. «Ես ՀՀԿ-ին գնահատելու բան չունեմ: Նրան էությունը բոլորի համար պարզ է»: Անկախ ամեն ինչից Սեֆիլյանը համոզված է, որ մեր ժողովրդի մեջ կան հազարավոր նվիրյալներ, որոնք թույլ չեն տա հանձնել արյան գնով ազատագրված հողերը: «Բոլոր զարգացումները լինելու են այսօրվա քաղաքական դաշտից դուրս»,- ասաց Սեֆիլյանը:

Սեֆիլյանը գտնում է, որ այսօր մենք ոչ թե զիջումների, այլ մեր անելիքների մասին պետք է մտածենք եւ, առաջին հերթին' ազատագրված տարածքները վերաբնակեցնելու մասին:  Սեֆիլյանը համոզված է, որ ԼՂ հարցում որեւէ զարգացում առաջիկայում չի սպասվում, բացի նրանից, որ Վաշինգտոնում Սերժ Սարգսյանի նկատմամբ ճնշումներն անխուսափելի են: «Այդ ճնշումները լինելու են ոչ թե ԼՂ հիմնախնդիրը լուծելու, այլ տարածաշրջանում իրենց շահերն ամրապնդելու, ներկա իշխանություններին ճնշելու են' ամբողջությամբ իրենցով անելու համար»,- ասաց Ժիրայր Սեֆիլյանը:

24.03.10 a1plus.am