«Միացում» Ազգային Նախաձեռնության Ծանուցումը

ՀՀ Արտաքին Գործերի Նախարար Է. Նալբանդյանին` Հայաստանի Ազատագրված Տարածքը Հանձնելու Ոտնձգությունների Քաղաքական Եվ Իրավական Հետեվանքների Վերաբերյալ

Գիտակցելով Հայաստանի ազատագրված տարածքի ռազմաքաղաքական, տնտեսական և պատմաիրավական բացառիկ կենսական նշանակությունը Հայոց պետականության գոյատևման և ամրապնդման համար,

Հաշվի առնելով, որ 1991-1994 թթ. արցախյան ազատամարտի արդյունքում ստեղծված Հայաստանի (ՀՀ, ԼՂՀ) համապետական անվտանգության ողջ համակարգը խարսխված է ռազմաքաղաքական և տարածքային այժմյա իրողությունների հիման վրա,

Քաջ գիտակցելով, որ տարածքային նվազագույն զիջումն իսկ հանգեցնելու է հրադադարի բուն և միակ երաշխիքը հանդիսացող ներկայիս ռազմաքաղաքական անվտանգության համակարգի ամբողջական փլուզմանը և Հայաստանի (ՀՀ, ԼՂՀ) պաշտպանունակության վերացմանը,

Ակներևաբար համոզված լինելով, որ Հայաստանի ազատագրված տարածքի ամբողջականության խախտումը հանգեցնելու է համընդհանուր բարոյալքմանը, տնտեսական ինքնաբավության և անվտանգության վերացմանը և, որպես հետևանք` Հայաստանի (ՀՀ, ԼՂՀ) զգալի հատվածի շուտափույթ և անդառնալի հայաթափությանը,

Արձանագրելով, որ հայրենի տարածքների զիջման դիմաց Հայաստանին (ՀՀ, ԼՂՀ) խոստացված միջազգային ցանկացած մակարդակի և կարգի երաշխիքներն ի զորու չեն լինի կանխել Հայաստանի դեմ Ադրբեջանի կողմից ռազմական գործողությունների վերսկսման անխուսափելիությունը,

Փաստելով, որ Հայաստանի ազատագրված տարածքի նվազագույն իսկ հատվածի զիջման և, որպես հետևանք` երկրի անվտանգության համակարգի քայքայման և պաշտպանունակության կորստյան պարագայում Հայաստանն ընդմիշտ կորցնելու է տարածաշրջանային ինքնուրույն գործոն և ռազմավարական գործընկեր դառնալու բոլոր հնարավորությունները,

Գիտակցելով, որ Հայաստանի ազատագրված տարածքի որևէ հատվածի հանձնումից բխող վերáնշյալ հետևանքների կործանարար համապարփակ բնույթը հանգեցնելու է պետության գոյատևման հիմնասյուների ամբողջական խարխլմանը և Հայոց պետականության հեռանկարային վախճանին,

Ի նկատի ունենալով, որ արցախյան գոյամարտի տարիներին ազատագրված ողջ տարածքը սահմանադրորեն ամրագրված է որպես ԼՂՀ տարածքային ամբողջականության բաղկացուցիչ,

«Միացում» ազգային նախաձեռնությունը զգուշացնում է ՀՀ Արտաքին գործերի նախարար Է. Նալբանդյանին, որ Հայաստանի ազատագրված տարածքի որևէ հատվածի ենթադրվող հանձնումը` Հայոց պետականության հիմքերը քայքայելուն միտված ծանրագույն պետական հանցագործությունն է և` Հայաստանի քաղաքացիների կյանքի նկատմամբ անհանդուրժելի ոտնձգություն: Հայաստանի ազատագրված տարածքը հանձնելու ցանկացած նկրտում հարուցում է որոշում ընդունողների և այն գործադրողների պատմական, բարոյական և քրեաիրավական համընդհանուր պատասխանատվություն`որպես հայության բոլոր հատվածների նկատմամբ գործած ծանրագույն հանցանք և քստմնելի դավաճանություն:

«Միացում» ազգային նախաձեռնությունը պահանջում է անհապաղ դադարեցնել Հայաստանի ազատագրված տարածքի նկատմամբ պետականակործան զիջումներին ընդառաջ գնալու բանակցային քաղաքականությունը, արագ և վճռական քայլեր ձեռնարկել ազատագրված տարածքները վերաբնակեցնելու, ինչպես նաև Հայաստանի Հանրապետությանը միջազգային իրավունքով վերապահված ԼՂՀ սահմանադրական ողջ տարածքում Հայաստանի Հանրապետության ինքնիշխանությունը վերականգնելու ուղղությամբ:

«ՄԻԱՑՈՒՄ» ազգային նախաձեռնություն

ք. Երևան, 21.11.08

հեռ. 010.27.77.83,   093.43.45.79

                                                                                   E_mail: miacumn@gmail.com