Ո'չ  Մի  Քայլ  Ետ

Հայե'ր: Եղբայրներ ու քույրե'ր:

Կրկին վտանգ է սպառնում մեր Հայրենիքին:

Արցախի լեռներում հազարավոր հերոսների կյանքի գնով նվաճած համազգային հաղթանակը դավաճանական ընթացքի արդյունքում կարող է վերածվել խայտառակ պարտության:

Ազատագրված տարածքները Հայրենիքի անբաժան մասն են:

Հայրենիքի սահմաններից ցանկացած նահանջ` դավաճանություն է: Ազատությունից հրաժարվողը ստրուկ է կամ խելագար:

Մեզ ասում են, թե զիջումները անհրաժեշտ են հանուն խաղաղության: Սա բացարձակ սուտ է և հերթական կեղծիք:

Տասնհինգ տարի շարունակ մենք ամեն ինչ զիջում էինք հանուն խաղաղության: Զիջում էինք, երբ ոտնահարվում էր մեր ազատությունը, զիջում էինք, երբ անարդարությունն ու կաշառակերությունը  վարակեցին ողջ երկիրը, զիջում էինք, երբ իշխող վարչախումբը կասկածելի գործարքներով խարխլում էր անգամ երկրի տնտեսական անկախությունը: Ամեն ինչ զիջեցինք հանուն  խաղաղության: Սակայն այսօր հարցականի տակ է դրվում նաև այս վերջին մնացած ձեռքբերումը` խաղաղությունը:

Տարածքային զիջումների եւ տեղահանված բնակչության վերադարձի մասին խոսողները իրականում պատրաստում են Հայաստանի  "պաղեստինացում " և փորձում են նոր պատերազմ հրահրել տարածաշրջանում:  

Խաղաղութան միակ երաշխիքը` Մռովի լեռներից մինչև Արաքսի հովիտը կանգնած հայոց բանակն է: Նահանջի մեկ քայլն անգամ կործանարար կլինի ողջ ազգի համար: Նահանջելով այսօրվա արեւելյան սահմաններից, մենք կորցնելու ենք հայոց արքաների միջնաբերդ Տիգրանակերտը եւ քրիստոնեության ամրոց Դադիվանքը, մենք հարվածի տակ ենք դնելու Մեղրին, Կապանն ու Գորիսը, Տավուշն ու Բերդը: Զիջելով ազատագրված տարածքները` մենք նորից աքցանի մեջ ենք թողնելու Արցախն ու կորցնելու ենք այն հաշված տարիներ անց: Իսկ կորցնելով Արցախը` մենք կորցնելու ենք մեր ուժն ու ոգին, դիմադրությունն ու հավատը, ուստի կորցնելու ենք ողջ Հայաստանը:

Հանուն խաղաղության, հանուն մեր սուրբ նահատակների,

հանուն Հայրենիքի` ո'չ մի քայլ ետ:

Պաշտպանելով հաղթանակը, մենք պաշտպանում ենք խաղաղությունը:

Նահանջը բերելու է նոր պատերազմի:

Միացեք մեզ:

Մեր գործն արդար է, միասին մենք կհաղթենք:

                                                                     

                                                                                            "ՄԻԱՑՈՒՄ " ազգային նախաձեռնություն

                                                                                   Երեւան            նոյեմբեր 2008 թ.

հեռ. 010.27.77.83,   093.43.45.79

                                                                                   E_mail: miacumn@gmail.com