Հայտարարություն 

Իրագործելով Ջավախքը հայաթափելու պետական ծրագիր, Վրաստանի իշխանությունները 2008 թվականին ձերբակալեցին “Միասնական Ջավախք” կազմակերպության ղեկավարներից Վահագն Չախալյանին և ապօրինի մեղադրանքով դատապարտեցին տաս, իսկ  Գուրգեն Շիրինյանցին հեռակա` տասնյոթ տարվա ազատազրկման:

Գուրգեն Շիրինյանցին Վրաստանի բռնապետ Սահակաշվիլիի կամակատարները չկարողացան ձերբակալել և նրա նկատմամբ հայտարարվեց հետախուզում:

Ըմբոստ և վճռական կեցվածքով այդ երիտասարդները և նրանց ընկերները, պայքարում են Ջավախքում բնակվող հայերի արժանապատիվ կյանքի համար: Նրանք մարմնացումն են ազատատենչ և ոգեղեն Հայ մարտիկի:

Այն, որ Հայաստանի հանրապետության իշխող վարչախումբը ազգային-պետական շահերը պարբերաբար ստորադասում և զոհաբերում է անձնական-հատվածական շահերին, որևէ մեկի համար այլևս զարմանալի չէ: Սակայն անբարոյականությունը նրանց համար այլևս սահմաններ չի ճանաչում:

Նույն տերերին ծառայող Հայաստանի և Վրաստանի նախագահների պաշտոնները զբաղեցնող անձիք, որոնք չեն վայելում ժողովրդի վստահությունը, սերն ու հարգանքը, հունիսի 24-ին պետք է հանդիպեն Երևանում:

Սերժ Սարգսյանին հրաշալի առիթ է ընձեռվել, մեկ անգամ ևս իր իշխանությունը երկարաձգելու նպատակով, քծնանքի միջոցով սիրաշահելու Սահակաշվիլիին և նրա արևմտյան տերերին:

Հայաստանի հանրապետության իրավապահ մարմինները հետախուզում են հայտարարել Վրաստանում փնտրվող Գուրգեն Շիրինյանցին:

Որևէ կասկած չպետք է ունենալ այս ռեժիմի այլասերվածության մասին, քանի որ Գուրգեն Շիրինյանցին հայտնաբերելով, նրան կհանձնեն Վրաստանի իշխանություններին:

Դատապարտում ենք ՀՀ իշխանությունների նման կեցվածքը, և կոչ ենք անում իրավապահ համակարգին անտեսել ազգադավ և տմարդի հրամանի կատարումը:             

“Հայ կամավորականների համախմբում” ազգային քաղաքական նախաձեռնություն 

24.06.09թ. ք. Երևան