Հայտարարություն 

Հայաստանի Հանրապետությանը պարտադրված հայ-թուրքական հարաբերությունների ներկա գործընթացը թևակոխում է վճռական փուլ:

 Միջպետական սահմանի բացման մասին խոսակցությունները ավելի են առարկայանում:

 Հայաստանի պետական այրերը հիմնավորում են, որ թուրքական կապիտալի մուտքը ՀՀ  բնական է և օրինաչափ:

 Հայ-թուրքական հարաբերությունների միջև առկա խոչընդոտները վերացնելու, երկու երկրների միջև դիվանագիտական հարաբերություններ ստեղծելու համար առաջարկվում է ստեղծել երկկողմ մասնագիտական աշխատանքային հանձնաժողովներ, ընդ որում նաև Ցեղասպանությունը ուսումնասիրող, որի մասին Մոսկվայում հայտարարեց ՀՀ չընտրյալ նախագահ Սերժ Սարգսյանը:

ՀՀ Զինված ուժերում  տեղի ունեցող կառուցվածքային փոփոխություններից փչում է ՀՀ ԶՈՒ-ն ՆԱՏՕ-ի ստանդարտներին համապատասխանեցնելու հոտը:

 Հայ ժողովրդից բռնազավթած իշխանությունը պահելու համար, Արևմուտքի ակնհայտ հովանավորությունը վայելող Սերժ Սարգսյանին մնում է գործնականում կատարել մի շարք քայլեր, որոնց արդյունքում  Հայաստանի Հանրապետությունը փուլ առ փուլ կդառնա Արևմուտքի և տարածաշրջանում նրա կենսական շահերը ապահովող Թուրքիայի արբանյակը:

 Այն է.

Ցեղասպանությունը դառնում է վիճելի հարց և անվերջ երկար քննարկվում է:

Զիջվում է հայկական ազատագրված տարածքները Ադրբեջանին: Հայկական զինված ուժերը դուրս են բերվում այդ տարածքներից և խաղաղապահի անվան տակ ՆԱՏՕ-ի զորախումբ է տեղակայվում  հայ-ադրբեջանական և հայ-իրանական սահմանների երկայնքով:

Լուծարվում է Հայաստանի Հանրապետությունում տեղակայված ռուսական 102-րդ ռազմաբազան:

Թուրքական կապիտալը աննախադեպ  մեծ հոսքով մտնում է Հայաստանի Հանրապետություն:

Հայաստանի Հանրապետությունում արևմտյան քաղաքական ազդեցությունը դառնում է գերիշխող:

Եվ այս ամենի արդյունքում Հայաստանի Հանրապետությունը ենթարկվում է Թուրքիայի կողմից տնտեսական, քաղաքական, այնուհետև ռազմական, երբ Հայաստանին պարտադրվի մտնել ՆԱՏՕ-ի կազմի մեջ, էքսպանսիայի:

Սա այն գինն է, որով Սերժ Սարգսյանը Արևմուտքի օժանդակությամբ փորձում է մնալ իշխանության ղեկին:

Քանի դեռ Հայաստանի Հանրապետությունում չի վերականգնվել սահմանադրական կարգը, պետական հաստատությունները չեն ծառայում ազգային շահերին, Թուրքիայի հետ հարաբերություններ ստեղծելու մտադրությունները համարում ենք ժամանակավրեպ:

Դատապարտելով Հայաստանի Հանրապետության ներկա իշխանավորների Թուրքիայի հետ բարեկամություն անելու մեծ ցանկությունը, հորդորում ենք իշխանիկներին ճամպրուկները արագ կապել և հեռանալ Հայաստանից:

“Հայ կամավորականների համախմբում” ազգային-քաղաքական նախաձեռնություն

02.04.09 ք. Երևան