ՀՀ նախագահ Ռոբերտ Քոչարյանին

ՀՀ վարչապետ Սերժ Սարգսյանին

Երևանի դատարաններից մեկում սկսվել է ազատագրական պայքարի նվիրյալ, Արցախյան պատերազմի հայտնի հրամանատար Ժիրայր Սէ‎ֆիլյանի և իր ընկերների դատավարությունը:

Նրան ներկայացված մեղադրանքները անհեթեթ են: Որպես պարգև ստացած զենքը կրելը մեղք չէ: Երկրի նախագահին կամ կառավարությանը քննադատելը և դրանց փոփոխությունը պահանջելը մեղք չէ: Ընտրությունները վերահսկելը, ժողովներ անելը, կազմակերպություններ ստեղծելը կամ ելույթներ ունենալը նույնպես մեղքեր չեն, այլ քաղաքացու պարզ իրավունքներ: Ազատագրված տարածքները հանձնելու կառավարության փորձերը կանխելը, ջավախահայության դատը պաշտպանելը, հայրենիքում աճող անբարոյության դեմ պայքարի դրոշակ բարձրացնելը ոչ միայն մեղքեր չեն, այլև յուրաքանչյուր հայրենասեր հայի պարտականություն են:

Կեղծ մեղադրանքներով հայրենքը պաշտպանելու համար հայրենիքում հաստատված սփյուռքահայ հերոսին բանտարկելը և բոլոր հնարավոր միջոցներով այդ բանտարկությունը ձգձգելը ամենամեծ ստորությունն է, որ կարող է կատարել Հայաստանյան որևէ իշխանավոր: Պակաս ստորություն չէ, երբ մերժում են այդպիսի անձին Հայաստանի քաղաքացիություն տրամադրել, կամ ազգանվեր գործերի համար ԿԳԲ-ական հալածանքի են ենթարկում:

Իրական հանցագործները Ժիրայր Սէ‎ֆիլյանին բանտարկողներն են, ով էլ որ լինեն` նախագահ, վարչապես, նախարար կամ կուսակցապետ: Նրանք այդ հանցանքը գործել են վախենալով Ժիրայր Սէ‎ֆիլյանի և իր համախոհ ընկերների ազգանվեր գործունեությունից:

Մենք պահանջում ենք անմիջապես ազատել Ժիրայր Սէ‎ֆիլյանին, տրամադրել նրան ՀՀ քաղաքացիություն և ընդհանրապես դադարեցնել ազգային գործիչների հալածանքները Հայաստանում: Մեր երազած Հայաստանում բռնապետությունը տեղ չունի:

Embassy of Armenia in Washington D.C.,         
2225 R Street, N.W.
20008
City: Washington D.C.
Phone: (202) 319 1976
Fax: (202) 319 2982