Արցախն Է Կոսովոյի Նախադեպըՙ

a1plus

՚Կոսովոյի անկախությունը ամերիկյան ծրագիր էրՙ. նման գնահատականի արժանացավ Կոսովի անկախության միակողմանի ճանաչումը ԵԽԽՎ պատվիրակներից շատերի կողմից Ստրասբուրգում կազմակերպված քննարկման ժամանակ:

Այս քննարկմանը ելույթ ունելու համար հերթագրվել էր նաեւ Հայաստանի պատվիրակության անդամ, ՚Ժառանգությունՙ կուսակցության նախագահ Րաֆֆի Հովհաննիսյանը, սակայն ժամանակի սղության պատճառով նրան այդ հնարավորությունը չտրվեց:

՚Կոսովոյի անկախության հռչակման մեր թեմայից անդին այս քննարկումը ավելի շուտ ընդհանրական քննարկում էր օրենքի ոչ ընտրովի կիրառման վերաբերյալ: Իհարկե, յուրաքանչյուր անկախության , ինքիշխանության հայտ պետք է քննվի իր արժանիքների համապատասխան, բայց փորձել լատիներեն իրավաբանական եզրույթներ գտնել այդ արհեստականորեն հիմնավորելու համար, փաստորեն անարգում է օրենքի իշխանության գաղափարըՙ,- ՚Ա1+ՙ-ին ասաց Րաֆֆի Հովհաննիսյանը` ներկայացնելով, թե ինչի մասին պիտի ելույթ ունենար:

Ըստ նրա` այն պետությունները, որոնք արտաքնապես վերջին շրջանում Կոսովոյի անկախության հռչակումը որակում են ինքնատիպ, իրականում ՚ներքուստ կոսովյան սկզբունքը իրենց հագով են դնումՙ:

Պարոն Հովհաննիսյանի գնահատմամբ` ՚գող, սիրտը դողՙ արտահայտությունը այս դեպքում խիստ տեղին է, քանի որ դրանով առաջնորդվելով են այդ պետությունները նախաձեռնել մի շարք ՚կանխարգելիչՙ միջոցառումներ` ռազմական, դիվանագիտական, քարոզչական: Նա համարում է, որ ոչ թե Կոսովոն կարող է դառնալ ԼՂ խնդրի կարգավորման նախադեպ, այլ Ղարաբաղն արդեն դարձել Է նախադեպ Կոսովոյի համար: Ըստ նրա` արցախյան ազատագրկան շարժումը խորհրդանշում է Խորհրդային միության ապագաղութացման գործընթացը, եւ այդ տեղի ունեցավ ավելի վաղ, քան քանդվել էր Բեռլինյան պատը:

՚Հարեւան հանրապետության ղեկավարները սանձազերծեցին ագրեսիայի եւ սեփական օկուպացիայի պատերազմ Լեռնային Ղարաբաղի ժողովրդի դեմ, եւ այստեղ էր նախադեպը, այսինքն` նախադեպը օրինավոր անկախության, ինքիշխանության, տարանջատման դա Արցախն է եղելՙ,-կարծում է Րաֆֆի Հովհաննիսյանը:

՚Կոսովոյի ճանաչման հետեւանքները, արձագանքերը շատ են եւ իրենց մեջ պարունակում են առավել բռնի լուսավորումներով շարունակություն, եթե պետությունների եվրոպական ընտանիքը եւ ընդհանրապես միջազգային հանրությունը շարունակի ապրել այս ինքատիպության գաղափարի պատրանքի տակ , եթե ինքը ձեւեր, մեխանիզմներ, եղանակներ չգտնի օրենքը հավասարապես, իմաստալից եւ ոչ ընտրովի եղանակով տարածելու համանման փաստական իրավիճակների վրաՙ,-ասաց ՚Ժառանգությանՙ ղեկավարը:

Հիշեցնենք, որ ԵԽԽՎ գարնանային նստաշրջանի օրերին Ստրասբուրգում հայկական եւ ադրբեջանական պատվիրակությունները պատրաստակամություն են հայտնել շարունակել բանակցությունները ԼՂ հարցով հատուկ ժամանակովոր հանձնաժողովի շրջանակներում: Հանձնաժողովի նախագահ լորդ Ռասել Ջոնսթոնը մտադրությունը ունի մայիսին այցելել Հայաստան եւ հանդիպել Սերժ Սարգսյանին:

Կարինե Ասատրյան