Օգտակար խորհուրդ` ցածր վարկանիշը բարձրացնելու մասին

Ժամանակ Երևան

Օրերս «Ազգ» օրաթերթին տված իր հարցազրույցում ՀՀԿ խմբակցությունից ԱԺ պատգամավոր Ռաֆիկ Պետրոսյանը մարտի 1-ի դեպքերի եւ դրանց հաջորդած այս ժամանակաշրջանում «Ժառանգություն» կուսակցության պահվածքը որակել է որպես «հակապետական»:

«Ժառանգություն» խմբակցությունից ԱԺ պատգամավոր Անահիտ Բախշյանն այսպես հակադարձեց ՀՀԿ-ական իր գործընկերոջ ասածին. «Ես ուզում եմ վերլուծել Պետրոսյան Ռաֆիկի ասածը: Ինքը պետությանը նվիրվել ասելով հավանաբար հասկանում է նվիրվել կլանին: Իմ կարծիքով` պետություն եւ գործող իշխանություն` վարչակարգ, հասկացությունները իր ընկալմամբ նույնն են, ինքը նույնացնում է դրանք: Իսկ ինչ վերաբերում է մեր խմբակցության պատգամավորների գործունեությանը, ապա նորից պիտի ասեմ, որ մենք այդ օրը այնտեղ էինք, որտեղ ժողովուրդն էր, ժողովուրդ, որը ունի քաղաքացիական դիրքորոշում, ունի իր իրավունքները պաշտպանելու ձեւ ու այդ ձեւը համարում էր հանրահավաքը: Իսկ «Ժառանգությունը» որպես, ընդգծում եմ, ընդդիմադիր կուսակցություն, միշտ այնտեղ է, որտեղ ոտնահարվում են ժողովրդի իրավունքները, արժանապատվությունը, եւ որտեղ մեր քաղաքացին ունի խորը վիրավորանք: Մեր գործունեությունը հակապետական է որակվել Պետրոսյանի կողմից, որովհետեւ գործող իշխանության կարկառուն ներկայացուցիչների գործունեության ամբողջ հակապետական լինելն էինք այդ օրը ցույց տվել: Լինել պետության կառավարող վարչակազմի մեջ ու օգտագործել զորքը, զենքը, տանկերը, ծեծն ու ջարդն այն ժողովրդի դեմ, որը բողոք ունի, ասելիք ունի ու իրեն լսել տալու ուրիշ հնարավորություն չունի, քան հանրահավաք կազմակերպելը, ու երբ այդ ժողովրդի դեմ նման քայլեր են արվում, այ դա է հակապետականը: Եվ մենք այդ մասին ենք այս ընթացքում խոսել, մենք իշխանությունների այդ վարքն ենք ի ցույց դրել եւ այսուհետ շարունակելու ենք նույն ոգով: Երկու խոսք էլ ՀՀ գլխավոր դատախազ Աղվան Հովսեփյանի մասին, ով հայտարարել էր, թե իբր «Ժառանգություն» խմբակցության անդամներն իրենց գործողություններով փորձում են բարձրացնել սեփական վարկանիշը: Ասեմ, որ գլխավոր դատախազը խելացի է, ճիշտ է ասել, բայց չգիտես ինչու` ինքը չի կիրառում այդ ձեւն իր վարկանիշը բարձրացնելու համար: Ինքը գիտի, որ իր վարկանիշն այսօր շատ ցածր է, զրոյական, մինուս, որովհետեւ իր գործողությունները Սահմանադրությանը դեմ են եւ չեն բխում պետականության շահերից: Ուզում եմ հիշեցնել, որ ինքը գրականություն սիրող մարդ է, լավ պոեզիա գիտի, ուստի պետք է իմանա, որ մեր պատմության մեջ բոլոր այն մարդիկ, ովքեր ապստամբության ղեկավար են եղել ու հակադրվել են` այսօր այդ մարդկանց պատմությունը հիշում է: Նրանք իրենց այդ քայլերն անելիս հաստատ չեն մտածել իրենց վարկանիշը բարձրացնելու մասին, նրանք մտածել են իրենց ազգի գոյության, հարատեւության մասին: Մարդու վարկանիշը բարձրանում է ազգի մասին մտածելու դեպքում եւ երանի թե մեր բոլոր իշխանավորները ժողովրդի կողքին լինեին գոնե լոկ իրենց վարկանիշը բարձրացնելու համար»: