|
Հաղորդագրություն
Սեպտեմբերի
14-ին քրեական վերաքննիչ դատարանում սկսվեց Ժիրայր Սէֆիլյանի,
Վարդան Մալխասյանի և Վահան Արոյանի գործով դատավարությունը: Մհեր Արղամանյանի
նախագահությամբ գործող դատական կազմը ուժեղացված է վերաքննիչ դատարանի նախագահ Մհեր
Խաչատրյանով, որը մեկընդմեջ հանդես էր գալիս իրեն ակնհայտորեն ավելի հոգեհարազատ
դասախոսի կարգավիճակով և փորձում էր իրավագիտության դասեր տալ դատապաշտպաններին:
Վերջիններիս պատասխաններն ու առարկությունները լսելուց հետո, դահլիճը համոզվում էր,
որ քրեական վերաքննիչ դատարանի դասախոս-նախագահը իր անհամեմատ երիտասարդ
ընդդիմախոսներից շատ ավելի սովորելու բան ունի, քան սովորեցնելու:
Մեղադրող Արթուր Մկրտչյանի
անտարբեր պասիվության ֆոնի
վրա, նրա գործը փորձում էր կատարել նախագահող դատավորը, որը Վարդան Մալխասյանին
հասցեգրված մեղադրական ենթատեքստ ունեցող հարցերի համար բազմիցս արժանացավ պաշտպան
Մուշեղ Շուշանյանի նկատողություններին: Վերջինս, անիմաստ համարելով դատարանի
նախագահին բացարկ հայտնելը, առաջարկեց նրան հանդես գալ ինքնաբացարկով: Դատարանի
վարքագծի գլխավոր առանձնահատկությունն այն էր, որ դատավորները (բացի Արմեն
Դանիելյանից) կարծես փորձում էին ինչ որ բան համոզել ամբաստանյալներին:
Մասնավորապես, Վարդան Մալխասյանին փորձում էին համոզել, որ նա ինչ որ հանցանք է
կատարել, իսկ Վահան Արոյանին` որ նրա կատարած հանցանքը իրենից հանրային մեծ վտանգ է
ներկայացնում: Ընդ որում, երբ փաստաբանները ինչ-որ բանով խանգարում էին դատարանի
նախանշած սցենարը, կամ երբ դահլիճը իր դժգոհությունն էր արտահայտում այդ
կապակցությամբ, դա բավական նյարդայնացնում էր նախագահող դատավոր Արղամանյանին, ինչը
անմիջապես արտահայտվում էր նրա դեմքի գույնի և ձայնի հիվանդագին փոփոխություններով:
Սակայն ներկաների գլխավոր
դժգոհության պատճառը կապված էր անվտանգության նվաստացուցիչ միջոցառումների հետ: Նախ,
հրապարակային դատավարությանը ներկա գտնվելու համար եկածները բախվեցին պետական
սահմանից ավելի պաշտպանված դռանը, որով անցնելու համար պետք էր դատարկել գրպանները
և պայուսակները: Արհեստական հերթ գոյացավ, ինչի արդյունքում մեծ մասը դահլիճ մտավ
շատ ուշացած, իսկ ոմանք ընդհանրապես չկարողացան մուտք գործել: Իսկ ահա դատարանում
հանկարծ պարզվեց, որ այս անգամ Ժիրայր Սէֆիլյանը
և նրա բախտակից ընկերները ոտնաշղթաներով են: Այս փաստը շատ զայրացրեց ներկա
հարազատներին և ընկերներին, պաշտպանները պահանջեցին ապահովել կողմերի
հավասարությունը: Վեճը սպառնում էի մեծ չափերի հասնել, սակայն այն ընդհատվեց Ժիրայր
Սէֆիլյանի
կողմից` "պետք չէ, ամեն ինչ պարզ է" արտահայտությամբ:
Այնուամենայնիվ դատարանը բավական արագ է աշխատում և արդեն հասցրել է լսել բողոք
բերող կողմերին, հարցաքննել է ամբաստանյալներին, նաև մերժել է նրանց նկատմամբ
կիրառված խափանման միջոցը փոխելու, ինչպես նաև Վահան Արոյանի մասը այս գործից
անջատելու միջնորդությունները: Հաջորդ դատական նիստը նշանակվեց երեքշաբթի`
սեպտեմբերի 18-ին, ժամը 12.30-ին:
This site is © Copyright Azadakrum, All Rights Reserved.
|
