Հայկական Ժամանակ, Լուսինե Բարսեղյան   

Ժիրայր Սէֆ‎իլյան- Արցախյան պատերազմում Շուշիի առանձնակի գումարտակի հրամանատար, "Մարտական Խաչ" Առաջին աստիճանի շքանշանակիր, 2001 թվականից "Ազատագրված տարածքների պաշտպանություն" հասարակական նախաձեռնության ղեկավար: 

1. Պարոն Սէ‎ֆիլյան, այսօր Շուշիի հարցը շահարկվում է նախընտրական քարոզչական շրւջանակներում: դուք, որպես Շուշիի ազատագրման մասնակիցներից մեկը ինչպես եք վերաբերում այդ ամենին: Ով է այսօր արժանի և ով իրավունք ունի խոսել այդ մասին:

            Ակնհայտ է, որ Շուշիի ազատագրման հոբելյանը, ինչպես նաև մինչ այդ բանակի տոնը, շահարկվում են նախընտրական նպատակներով: Ինչ-որ իմաստազուրկ շոուներ են կազմակեպվում, բայց դրանից, ըստ էության, չի փոխվում արհամարհական վերաբերմունքը, որ տարիներ շարունակ ցուցաբերվում է թե Շուշիի, թե ազատագրված մյուս շրջանների նկատմամբ: Շուշիում այսօր ավելի քիչ մարդ է ապրում, քան պատերազմի օրերին: Ուրեմն, ի’նչն ենք տոնում:

            Հաղթանակը պատկանում է ամբողջ ժողովրդին և ո’չ ոք իրավունք չունի այն շահարկել, առավել ևս օգտագործել նախընտրական խեղկատակությունների ժամանակ:   

2. Սամվել Բաբայանը հայտարարեց, որ Ձեզ և Վարդան Մալխասյանին ձերբակալել են իր պատճառով, իշխանություններն էլ Ձեզ մեղադրում են պետական հեղաշրջում անելու մեջ: Ինչ կասեք:

Նախ ասեմ, որ ես չեմ մեղադրվում պետական հեղաշրջում կատարելու մեջ, այլ իշխանությունը բռնի ուժով զավթելու կոչեր անելու մեջ, քրեական օրենսգրքի 301 հոդվածով: Իսկ ինչ վերաբերում է Բաբայանի հայտնած մտքին, ուզում եմ հիշեցնել որ պատասխաննելով պատգամավորների հարցերին, ես նշել եմ իմ կալանավորման մի քանի պատճառ, որոնցից մեկը "ընդդիմադիր, ոչ բաղձալի գործիչների հետ շփումներ ունենալն" էր: Իշխանություններին միշտ էլ սարսափեցրել է իմ և Բաբայանի նման համագործակցությունը: 

3. Այսօր որքանով է Ձեզ դրսից ին‎որմացիա հասնում: Ինչպես եք գնահատում քաղաքական իրավիճակը Հայաստանում նախընտրական պրոցեսի կոնտեքստում:

Քաղաքական ին‎ֆ‎որմացիային, կարծում եմ լիարժեք տիրապետում եմ: Նորից հայտնվել ենք այնպիսի իրավիճակում, երբ հանցավոր ռեժիմը, հանձինս հայտնի զույգի, մշակում է վերարտադրման նախագիծ, որը իրականցնում է և շարունակելու է իրականացնել ԱԱԾ-ն: Այս ծրագիրը հնարավոր է վիժեցնել միայն ժողովրդի բուռն բողոքի ալիքով: Այս իմաստով ընդդիմադիր գործիչների պատասխանատվությունը շատ մեծ է: 

4. Վերջին շրջանում փոփոխություններ ներքաղաքական կյանքում նկատում եք, թե՝ ոչ:

Կտրուկ փոփոխություններ չեմ նկատում: Պարզապես ինքան մոտենում է մայիսի 12-ը, իշխանության քայլերը ավելի հիստերիկ են դառնում:  

5. Քննչական գործողություններ Ձեր գործով հաճախ են իրականացվում, թե՝ ոչ: Թե Ձեզ կալանքի տակ պահելը ընդամենը նպատակ ուներ Ձեզ հեռու պահել նախընտրական գործընթացներից:

Ձերբակալությունից երկու օր անց, վստահելի աղբյուրից ինձ հայտնի դարձավ, որ դա ամենաբարձր ատյանի կողմից կայացված քաղաքական որոշում է և առնվազն մինչև մայիսի կեսերը ինձ պահելու են կալանքի տակ: Նման պայմաններում քննչական գործողությունները կրում են ձևական բնույթ: Իսկ անձամբ ես հրաժարվում եմ ցուցմունք տալ և որևէ գործողության մասնակցել, քանի որ քննիչները, լինելով հիշյալ որոշում կայացնողի կամակատարները, ընդամենը փորձում են ամեն գնով կատարել իրենց հանձնարարությունը: 

6. Ինչ կանխատեսումներ կարող եք անել, ինչ եք կարծում, ինչ զարգացումներ կարող են տեղի ունենալ մինչև մայիսի 12-ը և դրանից հետո:

Մայիսի 12-ից հետո իշխանությունները ունեն երկու ճանապարհ: Մեկը փախնել երկրից, երկրորդը՝ բռնի ուժով պահպանել իշխանությունը: Բնականաբար ընտրելու են երկրորդը: Մնացածը կախված է ընդդիմադիրների միասնակամությունից, ազնվությունից և կազմակերպվածությունից: Եթե ընդդիմությունը նշածս գնահատականի կամ որակի գոնե կեսն ապահովի, ապա իշխանությունները ստիպված կլինեն ժողովրդի առջև ծնկի գալ: 

7. Շաբաթ օրը մի քանի կհանրահայտ մարդկաց տներում, խուզարկություններ են տեղի ունեցել, հարցաքննություններ են ընթանում, հարուցվել է քրեական գործ իբր փողերի լվացման առիթով: Ինչ եք կարծում, սա կապ ունի նախընտրական պրոցեսների հետ, թե՝ ոչ:

Արդեն նշեցի, որ իշխանությունները դիմելու են բռնի միջոցների և այս խուզարկություններին և ձերբակալումներին պետք է նայել այդ համատեքստում: Կատարվածը սովորական բռնատիրական ռեժիմի գործելակերպ է: